Nəhcul-Bəlağə hikməton

Nəhcul-Bəlağə hikməton

Və ğalə Əli(ə):”İstənzilur-rizğə bissədəğə...Rızğo-ruzi de sədəğə doey ziyodkənən”.

Əmirəl-Muminin Həzrət İmom Əli(ə) Nəhcul-Bəlağə 137-ə kırtə hikmətədə bə ın məsələ işorə kardedə və hamyedə:”İstənzilu...

Bəziyon jıqo təsəvvır kardedən ki,ehyanə ıştə pul ya ıştə vaxti ya ıştə ləvazimoton bə qıləy niyozmandi və ehtiyocinə şəxsi  məxsus bızıno,çəy mol-devlətonku bə kam bəbe.qıləy holədə ki,hiçvaxti jıqo ni.dırıst bənə qıləy boğəvoni təmşoye ki,ıştə do iyən boği həloği kardedə və çun ki,çe boğəvonətiku qıləy elmımom ni,çəyku dəparseydəmon çe xıçə iyən livon brıniye bə doon miyvəon kaməti səbəb beydəni?.bın zəmon boğəvon cəvob doydə ki,ne.ehyanə do həloğ nıbu, həni hiç qıləy səmərəş nibəbe.sədəğə doey həm bənə doon həloğiye,çanədə həm kam kardey həm bıbo,çəmə jimonədə ziyodə səmərəş bəbe.

Odəmi dığğəti cəlbəkə çı ıme ki,co qıləy hədisədə,Həzrət İmom Əli(ə) hamyedə:”har qıləy zəmon ki,şımə fəğır biyon,de Xıdovəndi çəy royədə sədəğə doey,qıləy mənfəətinə ticorət bıkənən”

Həzrət İmom Əli(ə) de ın sıxanon de moliyyə muşkiloton iyən fəğrəti mıborizə bardey roon sədəğə iyən bə niyozmandon koməq kardeyədə bəyon kardedə.çın sıxani Ğıroniku bıə qıləy dəlilış həm heste.Xıdovənde-Xalığ Bəğərə mıborəkə surə 245-ə şərifə ayədə jıqo hamyedə: ”Mən zəlləzi ...Bə Xıdo çokə vom(ğarz) doəkəs kiye?(və bəy əto kardə bıə molonku infoğ bıko)ta Xıdovənd əy boəy çandə bərobər bıko?və boəy qıləy de erji pur bıə mıkofot heste.

Ğasbu iminə nəzədə çe sədəğə de Xıdo royədə koməq kardey və Xıdovəndi nemətonku bəhrə bardey miyono qıləy sərost iyən ruşinə rabitə bə nəzə nırəso,əmmo hukmən ın,ilahi punhonə lutf iyən hikmətikuye.beşək,qıləy şəxs ki,ıştən niyozmande iyən moliyyə cəhəto muşkilış bıbu, əmmo bə cokəson koməq kardey fike iyən isor kardedə,ıştə coniku dəvardedə,qıləy pokə rufəti pəydo kardedə.həmonə de səfo pur bıə iyən pokə ruf bə ilahi rəhməti cəlb bey boyis beydə və təbiiye ki,çəy bo ruzi ziyodətiro bıə tələbonədə bə icobət hədəfi və ğəbuli nez beydə. 

In nuktə bəpe viro bekardey nıbu ki,sədəğə iyən bə cokəson koməq kardey çanədə zumon vışkiyedə bəpe punhoni iyən məxfi əncom bıdəmon.çoko ki,Əhli-Beyt(ə) həm bə xeyrxahə əməlon məxfi əncom doey təkid kardəşone.illah ki,jıqo xeyrxahə əməlon bə cokəson ənqizə iyən motivasiyə doey boyis bıbu...