Nəhcul-Bəlağə pand iyən hikməton
Nəhcul-Bəlağə pand iyən hikməton
Əmirəl-Muminin Həzrət İmom Əli(ə) Nəhcul-Bəloğə 151-ə hikmətədə de bə dınyo iyən bəçəy neməton sabit nıbey və nopoydorəti işorə kardə holədə hamyedə:”Likulli muğbili idbar...İruj bə nav omə har qıləy çi,ruji həm peşt bəkarde(obəqarde) və qıləy çi ki,peşt kardedə,jıqo bızon hiçvaxti bıəni”.
In dınyo iyən çəy qırd maddi neməton foniye.ısət çe mol,məğam,cıvonəti,ofiyət iyən xəşəconəti bıbu,iqlə kəlmədə iruj bə insoni doə bıə maddi imkonaton həmmə,coqlə ruji çəy dastiku bəşe.cıvonəti,çın dınyo həmməysə barzə nemətonku bə hisob omeydə ki,de zəmoni dəvardey bə insoni peşt qordıneydə,çəy dastiku şeydə iyən piyəti və ocizəti çəy vırədə nışteydə.
Odəmi dığğəti cəlbəkə çi ıme ki,qıləy zəmon ki,neməton bə odəmi peşt qordıneydən,həmonə nemət ıştə əsər və təsiron həm deştə bardedə.jıqo ki,qahi zəmon inson təsəvvır kardedə hiçvaxti mevcud bıəni.zira ehyanə ıştən şeyəbe,əmmo çəy əsəron və təsiron baği mandəbe,ijən həm çəy jimoni dəvom hisob əbi.de cıvonəti şıey,ğıvvə, ğudrət,şoyvonəti,əhvol-ruhiyyə iyən sayir əsəron həm şeydən.
Çən,bəpe bəştə ixtiyorədə bıə çiyon dıl nıdəvastəmon.zira ın dıl dəvastey ya həmonə bə qıləy neməti dıl dəvastey, deçəy şey,çəmə ıştəni de məyusəti bə ico bıə bə şiddətinə norohətəti dıço kardedə.joqo ki,qahi vaxt bə norohətçəti və niqəronəti şiddəti xoto dınyo boəmə toyki və zılmət beydə.
Co tərəfiku qıləy zəmon ki,çəmə muşkiloton bərtərəfə beyədə iyən çəmə koonədə qıləy ojbemon və fərəc icod beyədə,əmə şo iyən xoşhol beydəmon.beşək,ın çokə hissi,Xıdo çəmə vucudədə ğərol doydə ki,bə umu iyən motivasiyə malik bıə holədə,sepas iyən təşəkkur həm bıkəmon.
Əmmo,i dastə odəmon hestin ki,bəvon nemət əto kardə bıə zəmon,qımon kardedən ki,həni hiç qıləy niyoz və norohətçətişon ni iyən ıştə tuğyonqərəti bino kardedən.ın fərdon zənn kardedən ki,Xıdovəndi nemət boəvon dayimi iyən poydore və hiç qıləy amil əy,zay və ya çəvon dastiku xaric kardey əzıni.qıləy holədə ki,ım jıqo ni.Xıdovənde-Xalığ Hədidi mıborəkə surə 23-ə şərifə ayədə jıqo hamyedə:”Likəyla ...Boştə dasto doə bıə çiyon xoto təəssəıf məhənən iyən bəşmə doə bıə çiyon dıl dəmavəstənən iyən şo məbənən”...
