Nəhcul-Bəlağə pand iyən hikməton
Nəhcul-Bəlağə pand iyən hikməton
Əmirəl-Muminin Həzrət İmom Əli(ə) Nəhcul-Bəloğə 163-ə hikmətədə jıqo hamyedə:”Əlfəğru movtul əkbər”-fəğrəti iyən beçizəti çe həyğiyə maqisə həm vey dıjde”.
Bəzi insonon qıləy zəmon ki,fəğır beydən iyən ıştə azizon vəşyan vindeydən,ıştə nəzorət və kontroli çe dasto doydən və de rohətə formə iştimoyi ğanunon ıştə po jiyədə noydən,insoni ədəb-əxloği viro bekardedən iyən boştə fəğrəti bərtərəf kardero har qıləy ko boştə cayiz iyən ğanuni hisob kardedən.kaliyon həm bə kufri marzi rəseydən iyən bə İlahi ğəzo rozi bey çe yodo bekardedən.
Fəğrəti bə insoni daxili istedodon iyən ğıvvon çe miyoniku şey boyis beydə və çəy fərdi iyən iştimoyi ruşd və ozavziyedə xələl icod kardedə.ım qıləy holədəy ki,inson qıləy iştimoyi mevcude və camiyədə bo baği mandey iyən çe cokəson kəno jimoniro ehtiyoc və niyozış heste.jıqo qıləy şərayitədə fəğrəti bə qıləy dəvominə zəcr və əziyyəti təbdil beydə ki,hətto çe maqiku həm vey dardnok və əziyyətine.Əmirəl-Muminin Həzrət İmom Əli(ə) coqlə vırədə jıqo hamyedə:”Əlğəbru xəyrun minəl fəğr”-ğəb ya həmonə mardey və dəfn bey bəsə fəğrətisə vey çoke”.çıro ki, fəğrəti çe insoni qırd istedodon iyən ğıvvon və ləyoğəton dəfn kardedə.və holın ki,əv məcbure ıştə jimoni idomə və dəvom bıdo.
“İnnə minəz zunubi...kali qınonkuye ki,de nımoj,sədəğə iyən zəkoti cubron beydəni,əvəz beşeydəni.çə həzrətiku dəparseşone: Ha Xıdo Rəsul ha!çən,de kom çi cubron iyən kompensasiya beydə?.Hamyeşe:bəştə məyişət iyən jimoni fik bey və boəy səy kardey”.
Həlbəttə çokonə ki,fəğrəti mızəmmət kardey bıə,əmmo bəzi rəvoyətonədə təmcid iyən tarif kardey bıə.joqo ki,Xıdo Rəsuli(s) jıqo hamyedə:”Əlfəğru fəxri və bihiftəxiru”-fəğrəti çımı fəxre və az de əy iftixor kardedəm”.oşko iyən məlum bıə çi ıme ki,bə pəyğombəri(s) fəxri səbəb beyə fəğrəti maddiyə fəğrəti ni və bəlkəm çe pəyğombəri(s) mənzur iyən məğsəd ıme ki,inson bəpe həmmə çiyonədə ıştəni bə Xıdovəndi mehtoc bızıno,ıştəni fəğır hisob bıko iyən eyni holədə de Xıdovəndi bəy əto kardə imkonaton çe İlahi nemətonku bəhrə bıbo.ım həmonə mənoye ki, Xıdovənde-Xalıği Fatıri mıborəkə surə 15-ə şərifə ayədə vardəşe və hamyedə:”Ya əyyuhənnasu...Ha məxloğ ha! şımə həmmə bə Xıdovəndi mehtociyon”....
