Nəhcul-Bəloğə pand iyən hikməton

Nəhcul-Bəloğə pand iyən hikməton

Əmirəl-Muminin Həzrət İmom Əli(ə) Nəhcul-Bəloğə 175-ə hikmətədə hamyedə:“Alətur-riyasətus səətus-sədr:Riyosəti avjor çe dıli hovujətiye”.

Əmmo çe dıli hovujəti kom mənoş heste və çıro ımrujnə rəğobətinə dınyoədə anədəvə əxtə əhəmiyyət kəsb kardedə?.aya dıli hovujəti çe hoston qətey iyən çe nopəsəndə şərayitiku roziyəti mənoədəy və ya ın xısləton idorəçəti iyən rəhbərəti koonədə çe səbarzəti kilid bey bəzıne?.

Har qıləy mudir har qıləy səviyyədə ısət çe xıyzoni idorəçətiku qətə tobə qıləy dıjdə təşkiloti səbəro kardey,de mıxtəlifə problemon dimbədim beydə:mıxolifəton,saxtə rəğobəton,ziyodə intizoron və bəzi vaxton hətto çe nezə odəmon tərəfiku bıə ziyonon.co tərəfiku çəş kardənin nıbə hodisəon bənə qıləy dəvət nıbə mehmoni omeydə,rəseydə və çe koy təzyiği çand bərobər kardedə.

Şımə fərz bıkən qıləy mudir bə qıləy stratejikə səhfi xoto,ıştə əsosə proyekti çe dasto doydə.jıqo qıləy şərayitədə qıləy hevujə sinə iyən dıli hovujətiş nıbə mudiron deştə dasti jiyədə bıə kollektivi və məcmuə mızəmmət kardey məşğul beydə və ya emosiyonalə ğərolon bekardedə.əmmo bə jıqo qıləy çokə xısləton soyb bıə mudiron deştə oroməti xandi kardey,behroni bo ağılmandə rayro bıə qıləy fırsəti təbdil kardedə.ın rəftor nəyinki,çe məsələ şiddətin bey navi qəteydə,bəlkəm bo koəvonon qıləy əməli iyən praktiki numunə beydə ta de problemon və muşkiloton dimbədim omeyədə məntıği çe həyəconi vırədə ğərol doydə.

Hevujə sinə iyən dıli hovujəti komilə numunə çe Xıdo-Rəsuli(s) jimonədə vindey bəbe.çəy ruşinə nımunəonku qıləyni çe Məkkə fəthi ğıssə və dastone ki,bəsə bıtpərəston sape bıə səbarzəti bəpeştə Məkkədə bə əməl ome.əvon ki,çe pəyğombəri(s) ıştən iyən çə həzrəti xıyzon və duston həxədə çandə nev cinoyətonışon kardəbe və əvon bo mısılmınon məhf kardero ıştə dasto omə har qıləy koşon əncom doəşonbe.həmonə torıxi ruji ki,çe pəyğombəri(s) veyə səhobəon dılədə çe intiğomi otəş şuləvər be, əmmo Muhəmməd Mustəfo(s) umumi əfvi iyən aministiya fərmonış sadir karde iyən həmmə kəsonış baxşe və hamyeşe:”Əlyəvm...yəni :Imruj,çe rəhməti ruje,nəyinki,çe intiğomi ruj”. Pəyğombəri(s) sinə iyən dıli hovujəti əxtə və anədə ziyod be ki,de əy təhğırəkə iyən de ə həzrəti hoziyə rəftor kardə kəson dimbədim omə zəmonədə hiçvaxti ğeyzin nıbe və əvoni tənbih kardey əvəzi,de votemon iyən qızəşti saxtə dılon nam iyən orom kardedəbe.