Şovu və Tanqəbın dionədə problemon

Şovu və Tanqəbın Lankoni səhrestoni Vazəru kənoədə ğəror qətə dionin. Çəvrey ekoloji vəziyyət bo jimoni bə beimkan vəziyyət eqıniə. Diy sakinon bo Meydan TV qəp jəşone. Məlum bıə ki, ruy çə tərəfi Liki şəhrestoni Piron di əraziədə 20 qılə kaqə ferma fəaliyyət nişon dodə. Çə fermon har qıləy dırozi 100 metre. Votedən ki, çe deputat İqbal Məmmədovi ailə uzvon tərəfo idarə bedə. İm fermaon de şirə sexi nomi inşa kardışone, çəyo məlum bıə ki, oyo kaq pebərosnen.

Tanqəbınıj Rasim Əliyevi bə muxbiri votəşe ki, çe ferma nışxor, çırkov və xırt-xəşəlon həmə bə ru erutə bedə. Çey buəvilə dastədə ətrofə dion əhali jimon bə tov nıvardə halət eqıniə. Vazəru ov təmom və lırd peqardə. Im vəziyyət jıqo dəvom bıko ətrofə dionədə insonon həmə noxəşi peydo bəkarden. Kaqə leşi şanqoney sutedən. Çey duəvulə insonon hanı-hıti bəvon ozzo kardəşe.

Əhali bə Prezidenti, muvafiğ vəzarət və təşkilaton şikat vığandəşe. Ekoloqiya Vəzarəti numayəndə omə vəziyyətiku aqah bıə, əmo bımi hiç qıley əncom kəşəş ni.

Şovu sakin İradə Əhmədova votəşe ki, Vazəru oviku təsərrufat və məişətədə istifadə əkemon. Isət ru anədə çırkin bıə ki, çey oviku istifadə karde həni mumkun ni.

Liki rayoni İcra Hakimiyyəti numayəndə bə Meydan TV parsi cəvob doəşe ki, “Lerik Broyler” kaqəvonə təsərrufat bə deputati ne, bə co qılə biznesmeni məxsuse. Bə çey fəaliyyəti Ekoloqiya Vəzarət, Səhiyyə Vəzarəti Sanitariya və Epidemioloji Xidmət nəzarət kardedə. Im təsərrufati bo insonon səhhəti və ətrofi ekoloqiya hiç qıley ziyan nişe.

Pironi divojon isə jıqo qıley qırej kardəşone ki, hokuməti bo əhali anədə problemon, məqəvuji kamış zınə, ısət çəvon di məktəbi tono sığə karxonə dutedə. Kaqə ferma buəvulə ve karxonə qardəvulə divojon jimoni təmom bə məşəğğət pebəqordınie.