“Tolışon sədo” rujnomə ımsornə 3-minə numrə çapo beşə.

Marti orəxnə rujonədə "Tolışon Sədo" rujnomə ımsor seminə, umumən isə 115-minə numrə çapo beşe. Isət çey xulasə bəşmə nəzə rosnie pidəmone.

Rujnomə sıftənə səhifədə İroni ənıvışt Xosrov Şahini "Sırr" nominə hekoyədə qıləy vocibə sırri ətrofədə qəpon təsvir bedə. Muəllif de tosə hekoyə orəxi ə sırri oşko kardedəni, həmonə sırr hejo pınhon mandedə.

Dıminə səhifədə nasir Camal Lələzoə "Zəmonə Ğəhrəmon" nominə hekayə dərc bə. Bı hekoyədə muəllif ıştə ğəhromoni simadə bılxinə odəmon, miyonqəzon, arajəkəson bə mizon qətedə, çəvon çanədə beməxə jimon karde bə əhandon rosnedə.

Peşonə səhifə çı sərredaktor Rafiq Cəlilovi səhifəy ki, əv ıştə "İnson bıbəmon vəse" nıvıştəyədə bə tolışi zıvoni munasibətədə təzyiğon ətrofin təsvir kardedə. Cəlilov Tolışıstoni dı qılə məktəbiku misal vardedə, nişon dodə ki, bə zıvoni çanədə təzyiğ bıbo, ə təzyiğ hukmən əks-təzyiğ bə əməl bəvarde. Qıləy məktəbi ibtidai sinifədə handə hırdən "çımı moə zıvonədə boçi dərs ni" votedə,  usyon kardedə, co qıley məktəbədə penə sinfi əğılon həmməyəvo bə tolışi zıvoni behuğuğə vəziyyəti ıştə  etirozi bəyon kardedən.

Çominə iyən pencminə səhifonədə tarixşunas Elnur Ağayevi alim Firudin Əsədovi həxədə nıvıştə elmiə-publisistə məğalə dərc bıə. Muəllif həm Firudin Əsədovi, həmən çəy Tolışi xanəti həxədə nıvıştəyonku herı-hevuj məlumat dodə.

Rujnomədə etnoqraf Nəriman Tolışi "Liki Zuən əhali mənəviə mədəniyyət" nominə etnoqrafikə tədqiqati seminə fəsliku vəsləon çap bıə ki, muəllif çı Zuəni əhali nəğməon, əloləon iyən co folklorə numinon həxədə ətrofinə məlumat dodə. Həmən çı "Aləm" jurnali sərredaktor, Vuqar Həmati, çe Bəxtiyar Ruşini "Xosə Məhol" kitobi həxədə nıvıştəy dərc bə. Hejo həmonə səhifədə çe Xanəli Tolış`i, Hidayəti Elmas`i, Nicat Dağlar`i tojə şeeron doə bə.

Rujnomə həm ım, həmən dəvardə numron Rafiqibloq saytədə  hande bəzıneyon.