Tolışıstonədə əhali jimoni problemon.

Tolışıstoni əhali sosial problemon sorbəsor qıvonin bedə. Hakimiyyəti orğanon bə əhali şikayəton pape bedənin, çəvon sosialə məşğılon həll karde ro ıştə vəzufə deni icra kardedənin. Jıqo siyasəti nəticən əv bedə ki, əhali bə məmləkəti bənə Boku və Sumğayıti dıjdə şəhəron kuç karde məcburiyyətədə mandedən.

 Meydan TV de jıqo problemon əlağədar  Liki Həmot diy mışğılon bə respublika cəmiyyəti nəzə rosniəşe. Im, həmən ətrofi tosə 10 qılə diy ən yolə problem nəğliyyati nıbeye. Diy əji Xəyalə Ğuliyeva bo muxbiri qəp jəşe ki, əvon bə rayoni mərkəz şe ro bə Lankon-Lik maqistralə ro piyodə şəninin. Im roən 17 kilometre. Har kəs anədə roy piyodə ğət karde zınedəni. Dionədə kam odəmi şəxsi avtomobil hestışe. Sakinon çand sorone ki, bə əlağədarə təşkilaton bo ım dion qıley ictimai nəğliyyatiə marşut oj karde xahiş kardedən, əmo diə məkəmon ki, çimi həll karde vey hoson çidə, rayoni rəhbəriyyət ımi bə ro nodəni. Məqəvuji əvon hejo pidəşone ki, Tolışıstoni dion tey bıbon, əhali ıştə məholo tərki vətən bıbo. Elşən Əsqrovən votedə ki, ım dion əhali  niməysə vey əsasən bə Boku Binə di kuç kardəşone. Əmə xahiş kardedəmon ki, bo ım dion ro qıley mikroavtobus ço bıkon. Əks təğdirədə çəmə odəmon həmə kuç bəkarden, dion təmom tey bəben.

Liki rayoni İcra Hakimiyyətiku bə Meydan TV doə parsi cəvobədə votəşone ki, “ponə sori Piron – Həmot – Vıjoker şosse ro bə istifadə doəmone. Həmonə zona 28 qılə diy 9100 əhali ım royku istifadə kardedə. Əlbəttə bə dion ictimaiə nəğliyyati ko nıkarde mumkun nıbə koe. Əmə ım problemi obətırnemon və bə muvafiğə orğanon muraciət bəkardemon.”

Liki hokumətə orğani doə ım cəvobiku məlum bedə ki, bı candə soron əvon  ım dion əhali xahişon məsəşon ni. Qirəm Meydan TV ım problem bə zıvon vardəş bənəbe, əvon hələən ımi oənətırnin və bə muvafiğ təşkilaton muraciət nəken.