Tolışıstoni bə anqıl qıniə problemon

Az.R mustəğil bıə rujiku tosə ısət Tolışıstoni hiç qıley iğtisadi, sosial və ekoloji problemon nəinki həll bedəni, əksinə həniən ziyod və qıvonin bedə. Bı dəvardə soronədə Tolışə məholi endemik beməyinə vişəon ançeşone, de prezident Əliyevi sərəncomi Tolışıstoni bənə Ğızıləğac və Hirkani ğoroğon ləğv kardışone. Əmo İroni tərəfi Hirkanə vişəon bə YUNESKO sərəncom doşone, və bənə umumdınyo sərvəti cey muhafizə elan kardışone.

Az.R tərəfədə isə Tolışıstoni ekoloqiya məhv kardə siyasət hələən dəvom kardedə. “Tolışmedia.com” sayt de ım problemi obastə məğalə bə əhandon edaştəşe. Çə məğaləku məlum bedə ki, Liki şəhrestoni Ancəqəv, Bursulum, ləkər, Vov, Vənədi, Sanbukəş dion vişəonədə şəvı ruj doancə benzinə mişoron sədo bıriə bedəni. İştənən ım ko çe rayoni məmuron tərəfo idarə və himayə bedə. Im vişə materialon həvateku bə dast omə pulon bə çəvon cif ru bedə. Boku məmuron rəsmən elan kardedən ki, Liki məntəğəon 95% quya de ğazi təchiz bıə, əmo bə ım məntəğəon hiç 30%-iən ğaz okırniə bıə ni. Çe əhali mutləğ əksəriyyət ısətən de ezımi ıştə kəon tosbonie məcburiyyətədən. Hərcənd ki, bə Boku muxalifəti etirafi əsasən Ermənistoni ki, ğaz hasilatış ni və ey xarico de valyuta hıridə, çey məntəğəon 100% de ğazi təmin kardə bıən. Məğalə muəllif orəxədə ğeyd kardedə ki, jıqo bışo çe Liki vişəonku əsər əlomət əmandıni.

Əlbəttə ki, ım sərostə fikre. Boku hokuməti bə Tolışıstoni təbiəti beetina munasibəti nətiçəy ki, Həmoşəru, Vərğədiz, Masəlu və Lankoni vişəon orəxnə doon anceşone. İsət nubə omə rəsə bə Liki və Ostoro məholi. Tolışə vişəon orəxnə ğism bı məntəğonədə mandə. Boku hokumət bə çəvon orəx beşe məğsədi bə vırə rosnidə.

Tolışə xalğ ıqlə ımi bəştə dılvandi doe bəzıne ki, İroni hokumət bə Tolışıstoni təbiəti muhafizə karde tənəvəç mandedə. Çəmə ayəndə varison İroni əraziədə muhafizə bıə ğəşənqə təbiəti bəşen bəvinden, çəmə zəminon bə biyaban peqordıniə Əliyev rejimi məmuron lənət bəvoten.