Liki rayoni “Relax” İstirahətə Mərkəzədə mərəşulə

Liki şəhrestoni əraziədə “Relax” nomədə qıley İstirahətə Mərkəz heste. Avğusti 16-ədə verqi mufəttişon omən ki, əyo təftiş bıbardon. Əmo mərkəzi həmkaron əvon bə muəssisə vadoəşon ni, dəvon hoçbəhoç bıən, “Azadlıq.info” hətto xəbə dodə ki, əvon ım mufəttişonşon kuə.

Çəyo devləti daxili koon vəzarəti, prokurotura və verqi vəzarəti həmkaron bahəm fəaliyyəti nəticədə “Relax”i rəhbər Mirəhməd Nərimanli və həniən 5 nəfər dəstqir kardə bıə. Isət əvoni çe “Bandotdel”i zindonədə oqətedən.  Nərimanli çe likijon respublika parlamentədə deputat İğbal Məmmədovi zoəy.

Im insidenti barədə devləti orqanon pevolo kardə məlumatədə votə bedə ki, “Relax” muəssisə 14 hektar əraziədə 20 qılə obyekti əhatə kardedə, əmo ey bə devləti budcə ponə sori 10 həzo 726 mənot, ımsori 7 manqədə isə cəmi 972 mənot verqi avjor kardəşe.  Bı səbəbən muəssisə fəaliyyəti təftiş karde zərurət bə miyon omə, əmo muəssisə həmkaron fiziki muğaviməti nəticədə ım mumkun bıə ni. Jıqo əməl bey vardəşe bekardəşe ki, mufəttiş və polisə həmkaron xəsarət səşone, bə çəvon avtomobilonən zəfə rosniə bıə. Im istirahət mərkəzi 6 nəfər həmkar de Cinayətə Məcəllə mufafiğ maddəon bə məsuliyyət cəlb kardəşone.

Im mərəşulə Respublika cəmiyyətədə bə muxtəlifə ray`on səbəb bıe. İğtisadşunas Vuqar Bayramovi votəşe ki, Verqion barədə Ğanunədə verqi avjor karde kommersiya sirri zıne və ey çəmiyyətiku niyo karde barədə maddə ləğv karde lozime və əqər Respublika əraziədə fəaliyyət nişon doə muəssison bə devlətə budcə doə verqion barədə bə əhali muntəzəm məlumat doə bıbo, ım curə insidenton təbii ki nibəben. Ğubad İbadoğluən ıştə həmkari votəyon təsdiğ kardəşe, həmən votəşe ki, devləti məmuron və deputaton ıştə mılkon barədə bə cəmiyyəti mutəmadi məlumat doe, və əvon har sor ıştə mədaxilon barədə deklarasiya elan karde məmləkətədə sivil verqi mədəniyyəti bə əməl varde roədə vacib qıley məsələy, devləti rəhbəriyyət ım problemi həll karde ro ğəti tədbiron vindənine.