Az.R-ədə tolışə milləti ımrujnə vəziyyət

“Tolishmedia.com” sayti qıley tolışə ruşinəfami tolışə milləti Az.R-ədə behuğuğə vəziyyətədə mande barədə fikron bə əhandon edaştəşe.

Həmonə ruşinəfikr votedə ki, tolışə xalği ıştə vətənədə tədricən bə ğul vəziyyət eğandedən. Tolışə rayonon həmə penə məğaminə vəzifədaron ğeyri-tolışono ibarəte. Isət jinə təbəğə məmuron, – koolec və miyonə məktəbi direktoron, bələdiyyə sədron, hətto vıjorkomonən bino kardəşone hakim toyfə odəmon təyin karde. Çe tolış mənşəninə  market soybon mılki məcburən dastonkuşon sedən, dodən bəştə toyfə odəmon.

Səvodinə tolışə mutəxəssison ki, test musabiğonədə de barzə nəticə koə vıron bə dast vardedən, məcburən bə tırkə rayonon vığandedən, bə tolışə rayonon isə ıştə toyfə kamsəvodinə kadron vardedən. Bə tolışə məktəbon təyin bıə həmonə yad-biqonə odəmon bə şaqirdon tolışə zıvonədə qəp je ğədəğən kardedən.

Muəllif ğeyd kardedə ki, əv ıştən çand kərə Lankon, Masəlu, Cəlilobod, Lik, Sumğayıti vəyəonədə şoyd bıə, bə xanəndə tolışə mahne sifariş doədə əv lovə kardedə ki, ey çe ıştə nuniku məhrum nıkon, çunki bey aspardəşone ki, vəyəonədə tolışə mahne nahando.  Diə bıkən tolışə xalğ bə kom ruj noəşone ki, Tolışıstoni Hışkədə diy qıley vəyədə tırkə tamada vəyə bino beədə tırki zıvonədə “bə tırkə zəmin xəş oməyon” votəşe, bımi i nəfəri etiraz kardəşe ki, “ıvrə tolışə zəmine, keynəku tırkə zəmin bıe?”- həmonə tırkə tamada çe vəyə soybiku tələb kardəşe ki, ə odəmi çe vəyəku bıtojno. Vəyə çamaat, vəyəsoybən daxil tarsiku ıştə sədo bekarde çurət kardəşon ni. Diəkən Əliyevon sulalə faşistə rejimi çəmə tolışə xalğ bə çı vəziyyət dəğandəşe ki, qıley co məholıj omə tolışə  vəyədə ıştəni çı curə behəyo və əğəyanə bardedə, odəmonən çe polisi tarsiku ıştə sədo bekarde hınə kardedənin. Muəllif məğalə orəxədə bə tolışə milləti numayəndon ovardedə, əvoni dəvət kardedə ki, bə jıqo behuğuğə vəziyyəti motijə nımandon, nıtarson, fəal surətədə bımi ıştə etirazə vanqi barz bıkon.