Nati erjon bıe bə mənoti kom təsiri nişon bədo?

Nati ğıyməti erjon bıe çe Az.R cəmiyyətədə qıley panika bə əməl vardəşe. Bə hokuməti numayəndon bo mənoti devalvasiya hiç qıley əlaməti nıbe barədə votəyon əhali bovə kardedəni, ıştə mənoton de valyuta - əsasən de dollar və avro əvəz karde pidəşone.

Məmləkəti vey bankon de valyuta nıbe vonə çimiku imtina kardedən.

Əliyevi hokuməti hələ 2015-minə sori vəd kardə iğtisadi islahaton, məsələn, mənoti bə sınov hardə məzənnə ovoştınie, və ya ğeyri-natə sahəon inkişaf kardovnie nəticədə iğtisadiyyati çe natiku jidastiə vəziyyətiku bekardə planon içra nıbin. İğtisadi behran çoko 5 sor bə nav keşvəri cəmiyyət bə təşviş dənoəşbe, ısətən həmonə vəziyyəte, Əliyevi hokuməti ım dəvardə soron hiç qıley foydəmandə iştisadi tədbiron bə jimon dəvunie nızınəşe. İğtisadşunas Nemət Əliyev “Azadlıq info" saytədə jıqo qıley proqnoz dodə ki, manoti devalvasiya 30- 40% miğdarədə bıe bəzıne.

Çe diqər iğtisadi təhlilqər Ğubad İbadoğlu bardə analizi nəticədə məlum bıə ki, martə manqi orəxnə 10 rujədə respublika bankon tosə 1 milyard dollari valyuta həvatəşone. Əv jıqo qıley ehtimal bə nav dodə ki, ım ğədər vəsait hiçən bə əhali həvatə bıə ni. İyo çe oliqarxon kəşə plani əloməton oşko hiss kardə bedə. 2015-minə sori devalvasiyadən əvon jəqo kardışone. Çe mənoti erjon bıeku bə nav ıştə mənotə əmonəton bə valyuta peqordınişone, çəyo hokuməti mənoti məzənnə 200% -sən vey erjon kardışe. Jıqo maxinasiya nəticə əv bıe ki, həmonə oliqarxon i ruji dılədə ıştə sərvət 2 ğat ziyod kardışone. Sodə məzlumə odəmon quzəran isə an ğədər bə peşo şe, çəvon sə məvacibi molyət 2 kərə erjon bıe. Əhali quzəroni devalvasiya nəticədə bı ğədər bə yavə vəziyyət eqınie qıley səbəbşən hıste, əvən çimiku ibarəte ki, çe Az.R ərzağə vıjori təğribən 70% çe ixraciku jidastie. Mənoti çanədə erjon bıe, avtomatik çe xarico bə məmləkət daxil bıə məhsulon ğıymətiən anədə boho bıe səbəb bedə.