Masəlu Məholşunasi Muzeyi həxədə.

Hələ Şura hokuməti vaxtonədə Masəlu rayoni Hışkədə di miyonə məktəbi muəllim Rəhim Təğiyevi həmonə məktəbədə qıley muzey onoşəşbe. Deştə şagirdon koməki ətrof məntəğəono xeyli ğədimə tarixi əşyaon bə həmonə muzey qırdə kardəşbe.

Hışkədə diy həndəvəri məntəğəon – Mədo, Ruəkəno, Sepadi, Zəvilə, Mololon, Miyonku, Akon dion ərazi məskun bıe tarix çand həzo sor təşkil kardedə. Bı səbəbən ım zəminonədə har sornə di təsərrufati kaşte koon əsnadə həmişə ğədimə devri artefakton bə oşko beəşin. Rəhim muəllim həmonə çiyon bə muzeyi eksponaton restə daxil karde roy çəvon muhafizə təmin əkardi. De ım minvali 15 sori muddətədə jəqo ğıymətinə ənəvəcon miğdar bə 7 həzo rəse. 1977-minə sori Azərbaycan SSR hokuməti bə Hışkədə di muzeyi rəsmi status doşe. Boəyo tojə bina inşa kardışe. Dəvardə əsri 80-minə soronədə Sovet hokuməti Hışkədə di muzeyi nom bə “SSRİ Muzeyon kataloq” daxil kardışe.

Çe Azərbaycanə Respublika mustəğiləti vaxtədən Hışkədə muzeyi ıştə fəaliyyət dəvom kardışe. Rəhim muəllim 2001-minə sori bə rəhmət şə bəpeş çey kinə Əntiğə Təğiyeva bə muzeyi rəhbərəti kardedə, bı muddətədə 2 həzosən vey əvec bə muzeyi siyahi daxil bıə. Haliləyə əsas fondədə 9 həzo, ehtiyat fondədə 2 həzosə vey tarixiə ğədimə diləq və ənəvəcon muhafizə bedə.  

2016-minə sori Azərbaycanə Respublika hokuməti Masəlu şəhərədə tojə muzeyə bina inşa kardışe. Hışkədə di muzeyi eksponaton bə həmonə bina bardışone, əyo dəğandışone. Əntiğə xanım votedə ki, kanə bina ki, Hışkədə diədəy, əyo tosə 500 qılə eksponat mandə. Çok əbi ki,  Hışkədədə çe Masəli muzeyi filiali oj kardə bıbo.

Əlavən ğeyd bıkəmon ki, bı muzeyədə xeyli, məsələn, bənə “duə, duləkon, dizə, qulə, qodul, bızəkə” və sair  ənəvəcon hestin ki, çəvon nomon iqlə tolışiədə heste, azər-tırki zıvonədə nomşon ni. Nə soveton vaxtədə, nəən ısətnə mıstəğiləti devrədə muzeyədə həmonə ənəvəcon nomon tolışiədə nıvışte icazə dodənin.