Haftoniədə Tolışə vişon ki ğır kardedə
Dəvardə həftə sosialə şəbəkəonədə Lankoni şəhrestoni Haftoni di ətrofədə vişə massivi ance məsələ bə muzakirə obyekt peqarde
İyuli 6-də i qrup ekoloqiya fəal hətto çe Ekoloqiya və Təbii Sərvəton Vəzarəti bina vədə etirazə aksiya dəvunişone. Əvon bəyon kardəşone ki, bə vişə fondi daxil bıə zəminonədə aroboğon eğande vişə massivi ğır karde səbəb bedə. Bımi orəx doe lozime. Çunki Respublika ərazi cəmi 8,2 (8 tam dadə 2) faiz de vişə əhatə bedə. Hərçənd ki, jıqo ərazion kamiku 30 faiz bənine. Hokuməti vişə zəminonədə aqroboğon eğandə siyasət bey vardə bekardedə ki, sahibkarə odəmonku vişə massivi ğır kardero stimul bə əməl omedə. Çunki, bo jıqo aqroboğon eğande ro devləti budcədə subsidiya co kardə bıə. Əslədə ım subsidiyon bəpe bo vişə massivi bərpo ro co kardə bıbo.
Ekoloqiya vəzarəti tono Ekoloji Ekspertiza Aqentiyyəti sədr Mirislam Ğənbərovi bə “Sputnik Azərbaycan”i votəşe ki, Vəziron Kabineti vişə zəminonədə mivə boğon eğande barədə ğəror doəşe. Ekoloqiya vəzarətən bə ə ğərori muvafiğ həmonə zəminon bə icarə dodə. Qirəm icarədaron de vişə massivi ğır karde məşğul bıbon, bəvədə de əvon muğavilə ləğv bənine.
Devlətə Ekoloji Əmniyyətə Xidməti rəis Hikmət Əlizadən məlumat doəşe ki, çəvon təşkil kardə tədğiğatə qrupi Haftoni əraziədə vişə massivi opot karde fakt təftiş kardəşe. Məlum bıə ki, 43 hektar əraziədə ki, bə “Beta” şirkəti icarə doə bıə, çe kul-kımotonku opot kardə prosesədə çand qılə dooən bıriəşone. Haliyədə “Beta” şirkəti cərimə karde məsələ muzakirə bedə.
“Teref.az” saytən co qıley jıqo fakti Ğusar rayoni əraziədə vağeə bıe həxədə nıvıştəşe. Eko fəal Raik Abdurəhimovi votəşe ki, “rayoni əraziədə Qalacıq nominə vişə massiv ki, əyo 300 sornə doon hestbin, tamam məhv kardəşone. Bı barədə bə Ekoloqiya vəzarəti məlumat dome, sosialə şəbəkədə video pevolo kardıme, əmo çe vəzarətiku bı əməli hiç qıley reaksiya nıdoşone”. Sayti muxbiriən ıştə məğalədə təsdiğ kardəşe ki, dəvardə sori ey Ğusar rayonədə bə vişon ğır karde dair məğalə dərc kardəşbe, əmo həmonə vəzarətiku bımi cəvob se mumkun nıbe.
Tolışə vişəon məhv kardə proses Az.R mustəğil beku bino bıə, ımrujən dəvom kardedə. Isətnə vəziyyəti jıqo cərəyan karde nişon dodə ku, Boku hokuməti bardə ekoloqiya məhv kardə siyasət Tolışə məholədə , əzcumlə həmə Respubluka ərazi vişəonədə tosə orəxnə doy bırie, yəni tosə vişə massivon bə daşt peqarde dəvom bəkarde.
İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.
