Qilonədə koronavirusi noxəş izofə bıə.
Qiloni noxəşxonəonədə 600 nəfəriku vey Koronavirusi noxəşi oloxtoniyəşone.
Qiloni tib elmon universiti sıxənəvot votışe: ım ostanədə koronavirusi noxəşon miğdor bə 605 nəfər rəse.
Bə İRİB raporti əsos, Qiloni tib elmon universiti sıxənəvot ımruj votışe: holihazerədə 605 nəfər korona noxəş ostani noxəşxonəonədən ki dəvardə 24 saəti mıddətədə 130 nəfər bə ım miğdor izofə bıə.
Doktor Fərdin Mehrabiyan de ım məsələ bəyon kardey ki 125 nəfər korona noxəş Qiloni noxəşxonəon reanimasiya baxşədə oloxtoniyəşone votışe: ımruj 16 nəfər bəhholə noxəş bə xususi oqətə vırəon bardəşone.
Əv de işorə bə ım ki ısət 129 nəfər bədholə korona noxəş Qiloni noxəşxonəonədə oloxtoniyəşone, votışe: Qilonədə koronavirusi behroninə şərayeti vəy qəteyro, millət bəbe haftə oxoədə həmonə cəm bıə vırəonku ijən diyəro bımandon.
Qiloni tib elmon universiti sıxənəvot millətiku tələbış kardə həmçınan səhiyyəvi protokolon rioyət bıkon iyən maskiku istifodə karde həm lazime.