Bo məhbuson ozodətiro Qilonədə Ərbəini ehson nomo kompaniya.

Ərbəine Huseyni matəmə rujonədə Qiloni diyə ğərorqo de xəyyeron koməki çı ğəsdo nıbıə məhbuson ozodəti zəminə icod bəkarde.

Bə Qiloni Telerədio raporti əsos, ın ostani diyə ğərorqo rəis votışe: bə ımsornə sori Koronavirusi pandemik şərayeti xoto ki zairon bə Kərbəlo səfər kardeyro məhdudiyəton bois bıə, de xəyyeron koməki Ərbəini ihson nomo kompaniya dəvoniye çərçivədə çı ğəsdo nıbıə Qilonıjə məhbuson ozodəti zəminə icod bəbe.

Əlirıza Yəzdani əlovəş karde: həminə kompaniya çərçivədə 40 nəfər çı ğəsdo nıbıə məhbuson de səfə manqi 30 minnə ruji həmzəman Qiloni zindononku ozod bəben.

Əv ın kompaniya dəvoniyeyku hədəfi bo ğəsdışon nıbıə məhbuson ozodətiro Qilonıjon maliyə koməkon qırdə karde bəyon kardışe.

Imsor iyən Ərbəine Huseyni ğeyri İrağıjə zairon andədə kam bey bəpeşt, Kərbəlo səfəriku diyəro mandə kəson de ihsonon və humanitar koməkon vositə ıştə eşğ və irodəti bə İmom Husey(ə)-i nışo doe holədən.

Xorək və ərzağ koməkon, ihsonon iyən Qiloni muxtəlif məntəğonədə Ərbəini məxsus xidmət xeyməon fəaliyət həminə rujonədə dəvom kardeydə.

2 sor çimi bənav və dınyoədə Korono pandemik şəroyeti bino nıbey zəmonədə 3 milyon nəfəriku vey İronıj əcumlə 52 həzo nəfər Qilonıj Kərbəloədə Ərbəine Huseyni mərosimədə iştirok kardeyro bə İrağ səfər kardə bin.

Səfə manqi 20, Sentiyabri 27, Kərbəloədə İmom Huseyn(ə) və çəy bəfodorə əshobi şəhodəti çılım ya xod Ərbəinə ruje.

De həminə mınosibəti hasor çand milyon zair bə Kərbəlo şedə bin ki bə Korona pandemik şərayeti xoto İrağ ımsornə zairon səhmiyə miğdori vey kamış kardə.