Rəştədə Ərbəinion iclos.

De tarix əsoxtə universitədə bıə koəkəyon nomo i minnə hınə iclosi oxoədə bıə mərosimi bə ico zinə Rəştədə və de ostadon, tələbəon iyən muğəddəsə mudafiyə bə pensiya bışə canq əkəyon iştiroki Ərbəinion iclos bərpo be.

Bə Təsnim aqentiyəti raporti əsos, Qilon ostani universitonədə Yolə Rəhbəri nımoyəndəti təşkilati rəis həminə mərosimədə votışe: 1400 sor çimi bənav bıə iştimaiyətədə Muaviyə anədə tars icodış kardə be iyən islomış təhrif kardə ki İmom Huseyn(ə) çı Peyğəmbəri sirə məhv beyku xəbəş do və əy bəji kardeyro ğiyomış karde.

Huccətul islom vəl muslemin Alimuhəmməd Əbbosi bə ın nuktə işorəş karde ki İmom Huseyn(ə) çı həğiği islomi ijən bə millət nışoş do və ibrozış karde: Yəzidi coh-cəloli darşiye çı Seyyeduş-Şuhəda(ə)-i ğiyomi 2 minnə mesaj be.

Əv təkidış karde ki İroni islomiyə inğilob həm Şah rejim və istikbori kişvəron vədə muğavimətış karde və səbarz bıə.

Əbbosi votışe: 8 sornə muğəddəsə mudafiyə iyən məntəğə ozodtələbon əcumlə Yəməni milləti muğavimətonədə Seyyeduş-Şuhəda(ə)-i sirəku olqo peqəte muşahidə bıə iyən ımruj milləton istikbori hukuməton vədə mandedən.

Qilon ostani universitonədə Yolə Rəhbəri nımoyəndəti təşkilati rəis əlovəş karde: nodonəti iyən bedinətiku islomi iştimaiyəti xilos karde çı İmom Huseyn(ə)-i hərəkəti co qılə hədəf be ki ə həzrət dıştə xuni əy bə vırə rosnişe.

In iclosədə Ərbəin ziyorəti handey bə peşt şəhidon inəon intizori barədə təkyəqo nomo film pəxş be.

Imruj Hicri Ğəməri, 1443, Səfə manqi 20, bərobər de Miladi 2021, Oktiyabri 27 Kərbəloədə İmom Huseyn(ə) və çəy bəfodorə əshobi şəhodəti çılım ya xod Ərbəinə ruje.