Ərbəine Huseyniədə Huseyni eşği hərorət.

Ərbəini şemoniku diyəro mandə kəson çı Huseyni eşği hərorəti bəji oqətəşone.

Imruj Hicri Ğəməri, 1443, Səfə manqi 20, bərobər de Miladi 2021, Oktiyabri 27 Kərbəloədə İmom Huseyn(ə) və çəy bəfodorə əshobi şəhodəti çılım ya xod Ərbəinə ruje.

De həminə mınosıbəti çand milyon zair bo Ərbəine Huseyni mərosimədə iştirok kardeyro bə İraği cənubədə bıə Kərbəlo şəhri varid bıdən.

Əmmo ımsor Kərbəloədə Qilonıjə zairon 52 həzo nəfəriyə iştirokiku xəbə ni, və bə Koronavirusi pandemik şəroyeti xoto İraği kişvər zairon vədə saxtə məhdudiyəton noe bois bıə ki Qiloni şahrvandonku kamə miğdori Ərbəini şemonədə iştirok kon, ta Qiloni mısılmonə milləti tərəfo naibuz-ziyorə bıbun.

Co tərəf Ərbəini səfəriku diyəro mandə kəson ki Huseini eşği hərorəti bəji oqətəşone, zinə və ımruj de Huseyni kərvoni bə ico ıştə eşğ və irodəti bə İmom Huseyn(ə)-i nışo doe holədən.

Qiloni şəhronku xəbə omə ki Ərbəine Huseyni əzodoron yolə qırdbımon zinə de səhiyyəvi protokolon rioyət karde bərpo bıə, iyən ımruj dəvom kardeydə.

Zinə həmçenin Ərbəinion nomo iclos de tarix əsoxtə universetədə ko əkəyon hınə 1 minnə iclosi oxoədə bıə mərosimi bə ico, de ostadon, tələbəon və muğəddəsə mudafiə canq əkəyon bə pensiya beşə kəson iştiroki bərpo bıə.

Ərbəinə rujədə çı Qiloni milləti ihsonon və humanitar koməkon həm dəvom kardeydə.

Xəbə omə çı ostani vey Ərbəini xidmət xeyməon bə umum millət xususi məhrum və diyəro mandə məntəğəonədə bıə cəmaəti komək kardedən.

Qiloni xun ovıştoniye təşkilat həm elanış kardə ki ım təşkilati həmmə mərkəzon ımruj çı dovtələbə cəmaətiku xun qətero kamilən hozzətiədən.

Tolışi Rədio ijən dınyo şiəyoni 3 minnə İmom, Həzrəte İmom Huseyn(ə) və çəy bəfodorə əshobi şəhodəti çılım ya xod Ərbəinə ruji bə şımə təsliyət ərz kardedə.