Qilonədə 2 milyord dollar ixracati zərfiyət heste.

Zinə və de İroni xarıci vəziri iğtisodi muavini iştiroki, Rəştədə çı Qilon ostani ixracati zərfiyətonku çoknə istifodə kardey iclos bərpo be.

Bə İrib raporti əsos, Qiloni ostandar həminə iclosədə ostani ixracati harsor 670 milyon dollar bəyonış karde və votışe: de zərfiyətonku istifodə kardey vositə həminə miğdori bə 2 milyord dollar rosne bəznımon.

Əsədullah Əbbosi bə Qiloni sənaye, ditəsərrufat və texniki xidməton baxşədə bıə zərfiyəton işorə və bə Rəşt-Kaspiyən osonə ro komil bey iyən qomruk və nəğliyotədə inkişofi zəruriyəti təkid kardışe.

İroni xarıci vəziri iğtisodi muavin həm ın iclosədə çı Qiloni 2 milyord dollar ixracat zərfiyətiku tam istifodə karde qıləy komil iyən həmmə tərəfinə siyasəton jintonədə əməli zınəş be və votışe: Kaspi dıyo hamsuyə kişvəron iyən Ğəfğaz və mərkəzi Asiya məmləkətonədə bo İron vey cəzb əkə vujuron mıvcudin.

Məhdi Səfəri çı İroni tojə dıvləti siyosətonış de 15 qılə hamsuyə kişvəron mıbodiləon inkişof doe elan və bəyonış karde: de İroni ixracat zərfiyətonku fəğət 25 faizi cəzb kardey vositə har sor 100 milyord dollar bəromə aid bəbe ki kişvəri valyuta ehtiyoci təminəkəy.