Tolışə xalqi yolə şair Əli Nasiri vəfat kardəşe
Fevralə manqi 1-minə ruji tolışon milli ruh, muasir azərbaycanə və tolışə ədəbiyyati korifey, Azərbaycan Respublika Xalq hərəkati nomdarə siyasi xadim, nəğməkarə şair Əli Nasir bə həxə dınyo dəro qınie.
Seyyid Əli Nasir ĞıbonƏli zoə 1955 -minə sori mayə manqi 5 -minə ruji Lankoni şəhərədə moəo bıə. Umumtəhsil məktəbən bı şəhərədə orıxniəşbe. Deştə sadə, təmiz mənəviyyati cəmiyyətədə yolə hurmət və ehtirami soyb bıe. Bə qorə Sovet hakimiyyəti orəxnə soronədə bino bıə xalqə hərəkati lideronədə qıley be. Çey bə vaxti nıvıştə və bastə kardə "Ey ana vətən" nominə marş bə həmə Azərbaycan Respublika Xalq hərəkati himn peqardəbe, Boku "Azadi" meydonədə ım himni handedəbin.
Əli Nasir həmən ıştə tolışə milləti fərzənd bıe, tolışi milli huğuğon de barzə vanqi bə zıvon vardedəbe. Bə qorə Əliyevi rejim əv 8 sor zindonədə oqətışe. Əmo çe ıştə əğidəku qordınie nıznışe.
Çey nıvıştə "Kərbəla musibəti" poema muasir Azərbaycan poeziya şah əsəronədə qıleye. "Qonə şələ" poema bə tolışi tarixi dair tolışi zıvonədə nıvıştə bıə nadir sənət mirvarionədəy. Çey "Atropati nəvəm ha" şeer bənə co şeeronış tolışə fərzəndon zıvonədə əzbəre. Çey nıvıştə və ifa kardə "Qiləvo", "Niməy mardə, niməy qardə" mahneon de sa soron tolışə xalqi ğəlbədə daima əks -sədo bədo.
Əli Nasiri xoto Tolışə milləti dılədə əbədi vırə qətəşe. Əv çəmə milləti yolə tarixi şəxsiyyətonədə qıley bıe. "Tolışi radio" həmkaron bə çəmə milləti jıqo xotomandə şəxsiyyəti ailə, bə çey nezə odəmon və bə çəmi tolışə xalqi ıştə həmdardi izhar kardedən.
Xıdo ey rəhmət bıko. Əhli -behişton resədə ğərar bıdo, inşaallah.
