Qilonədə bə şəhidon inəon ehtirom kardey mərosimon.

Zinə və de Xanım Ummul-Bənin(s) bəfot sorəqardışi həmzəman və de muxtəlif mərosimon dəvoniye vositə çı şəhidon inəon vırə və məğomiku ğədrdonəti be.

Bə Qiloni Tele-Rədio raporti əsos, zinə Rəştədə bıə səbr iyən muğaviməti simvol nomo məxsus mərosimədə Qiloni ostandar Əsədullah Əbbasi votışe: şəhidon inəon dılədə bıə xatirə və sıxanon çı fidokorəti mədəniyəti mehvər bə hisob omeydə ki bəpe əvoni bıməsəmon.

Çı Qiloni ostandari təşkiloti jenon iyən ailə baxşi muavin Zəhra Yəğubnejad həm həminə iclosədə votışe: şəhidon inəon de Həzrət Ummul Bənin(s)ku ulqu peqətey vositə ıştə fərzəndon bə islom dini təğdim kardışone.

Həminə mərosimədə çı Qiloni 40 qılə şəhidon ailəonku ğədrdonəti be.

Bənə jığonə mərosimon Ostoro və Məncilədə həm bərpo bıə iyən ın 2 qılə şəhri rəsmi şəxson bə şəhidon inəon osəğande kənoədə çəvon səbr və məğomiku ğədrdonəti kardışone.

Qilon ostanədə təğribən 4 həzo inə və həyot həmro hestin ki İroni islomiyə nizomi royədə ıştə əzizon fido kardəşone.

Zinə çı Həzrəte Əbbas(ə)-i bozorqvarə inə Xanım Ummul-Bənin(s)-i rehləti sorəqrdış be ki İroni təğvimədə bə şəhidon inəon ehtiron noe milliyə ruj ğeyd bıə.