Bəhmənə manqi xoşə ətrəbu rəseydə.

Əzizə Tolışon qədə qədə çı İroni İslomi İnğilobi səbarzəti manq yəni Bəhmənə manqi xoşə ətrəbu rəseydə iyən muxtəlif təşkiloton ıştəni bo məxsus bərnamon dəvoniye hozzo kardeydən.

Qiloni muxtəlif mədəni təşkilaton həm ıştə fəaliyəton bino kardəşone iyən planon kəşe holədən ta fəcri 10 rujonədə iyən bə İnğilobi səbarzəti xoto məxsus mərosimon dəvonon.

Bə Tolışi Rədio raporti əsos, tojədən iyən Qilon ostani Tele-Rədio təşkiloti vırədə bərpo bıə iclosi çərçivədə və de mədəni təşkilotonku nımoyəndəon iştiroki fəcri 10 rujon məxsus bərnamon həmohənqəkə iclos bərpo bıə.

Həminə iclosədə ki Qilon ostani Tele-Rədio təşkiloti mudiron həm əyo iştirok kardedə bin ın təşkiloti yol Seyd Muhəmməd Bağır Bağırzodə votışe: mədəni və təbliği təşkiloton bəpe de həmkarəti iyən həmdıləti İslomi İnğilobi barzə nəticəon bə umum ictimaiyəti nışo bıdən.

Əv votışe: dışmonon hədəf ıme ki İronədə bıə muşkilaton dıjd və muvəffəğiyəton qədə nışo bıdən əmmo millət de ın nizomi bə ico bey vositə həmmişə sabitış kardə ki nizomiku co bıdə ni iyən çəy erj-prinsipon jintonədə bəmande.

Maştə Bəhmən manqi 1 minnə ruje ki təğvimədə İroni İslomi İnğilobi bə səbarzəti rəse rujon bə yod vardeydə.

Bə həinə mınosibəti xoto məxsus mərosimon manqi 12 tosə 22 yəni Fəcri 10 rujonədə dəvoniyey bəbe.