Bəhmənə manqi 14 minnə rujədə bıə məxsusə mərosimon dəvom kardeydə.

Mehribonon, bə İroni İslomi İnğilobi səbarzəti 43 minnə sorəqardışi xoto Fəcri 10 rujonədə bıə məxsusə mərosimon de obdonəkə plan-layihəon bə istismor rosniye və mədəni bərnamon bərpo kardey dəvom kardedə.

Imsor Qilonədə de Fəcri 10 rujon dəme həmzəman 200 qılə proyekt de 3 həzo milyord tımən budcə co kardey vositə muxtəlif sahonədə bə istismor bərəse.

Məsələn zinə və de Masal tolışə şəhri sosiaol rifoh idorə zəhməti 30 qılə kə bə ın idorə ehtiyocinə şəxson doə bəy.

Jığo elan bıə ki təğribən 5 milyordo 400 milyon tımən bo həminə kəon duteyro budcə ixtisos doə bəy.

Əmmo mədəni bərnamonku həm xəbə omə ki zinə Qiloni məktəbxonəonədə Fəcri nımoyeşqoh ıştə koş bino kardə.

Həminə nımoyeşqohonədə İroni İslomi İnğilobi barədə şikil iyən hınə əsəron bə tələbə iyən mıəlimon nışo doey bıdə.

Hicri şəmsi 1357 minnə sori Bəhmənə manqi 12 ədə İroni İslomi İnğilobi təsisəkə İmom Xomeyni(r) 14 sor vətəniku dər bə dər bey bəpeşt bə İron varid be; peşo 10 ruj bədiqə yəni Bəhmənə manqi 22 minnə rujədə İroni milləti islomi İnğilobi səbarz be.

Isət 43 sor ın İnğilobiku dəvardeydə.