Məntəğədə Amerkə mıdoxiləon çəvon mənafe təminəkə ni.
Xosə tolışon, Ostoroədə bıə zinə ruji cımə nımoj de ın şəhri tojə xətibi xutbəon bərpo be.
Hucətul islom vəl muslimin Muhəmməd Cəvad Bağıri ki çimi bənav çı Əsolım tolışə şəhri cımə İmom be, tojədən bənə Ostoro şəhri cımə imomi elan bıə.
Əv zinə Ostoroədə ıştə i minnə cımə nımoji bərpo kardey xutbəonədə votışe: Rusiyə və Okrayna mınoğişədə Amerkə mıdoxiləon hukmən Vaşinqtoniro əks nəticəon bois bəbe.
Hucətul islom vəl muslimin Bağıri əlovəş karde: Rusiyə bə Okrayna həmlə kardey barədə Amerkə tərəfo zəmon təiin karde çı məntəğə koonədə Amerkə mıdoxiləon və Vaşniqtoni tərəfo macəro soxte nımonəy.
Əv Okrayna çı İroni şimoli hamsuyə kişvəronku qıləyni bə hisobış varde və çı Rusiyə nufuz və siyasəton barədə votışe: əqə bə Avropa tərəf ovoştoniyə qazi cərəyon Maskva tərəfo ğət iyən bastə bıbu hukmən vəşemon iyən enerji vujurədə vey bevəcə behroni bois bəbe ki Amerkə bəpe çəy barədə mığət bıbu.
Ostoro şəhri tojə imom cımə ıştə xutbəon co baxşədə, bə İroni Şərği Azərbaycan ostani milləti virtual surəti de İroni Yolə Rəhbəri vindemoni mərosimi işorəş karde iyən Ostoroədə ıştə koy bino bey zəmonədə çın şəhri rəsmi şəxson iyən umum iştimaiyəti bəy nışo doə məhəbbətiku ğədrdonətiş kardə.