Ostoro Cımə İmom: məntəğə kişvəron bəpe bə israil umidışon nıbu.

Səmimi həmzıvonon, Ostoro şəhrıstoni cımə İmom votışe: bə İraği Ərbilədə bıə sioniston hərbi baza, İroni islamiyə inğilobi sepahe təşkiloti rəketiyə həmlə, bə məntəğə kişvəron qıləy mesaj be ki bəpe bə israil umidışon nıbu.

Bə İrna aqentiyəti raporti əsos, zinə və Ostoro cımə nımoji xotbəonədə, Hucətul İslam Muhəmməd Cəvad Bağıri əlovəş karde: dəvardə soronədə Amerkə və İsrail bə İslamiyə İroni zid, muxtəlifə xəbisə planon əncom doəşone ki çəmə atomiyə alimon və şəhid sərdor Ğasım Suleymani terror, əcumlə çəvonku be, çən ın rejimon bəpe har ləzzə saxtə intiğomi intizorədə bıbun.

Ostoro cımə İmom ijən bəyonış karde: mıstəğim surəti İroniku iyən Şəhid Suleymani şəhodətə saəti zəmonədə bə sionist rejimi baza rəketiyə həmlə, çəmə deşmenonro qıləy kabus be, iyən bə sionist cinoyətkorə rejimi ciddi reaksiya nışo doe bə hisob omeydə.

Hucətul İslam Muhəmməd Cəvad Bağıri ijən əlovəş karde: rəket və co hərbi təchizaton çı İroni vey zumandə mudafiə əbzaronin ki bənə mudafiə amil, deşmenon dılədə tars və dəhşəti bois bıdə.

Əv idoməş do: sionist rejim məhv bey holədəy və Fars Dıyo ərəbiyə kişvəron hakimon iyən Tırkiyə prezident boştə kişvəron əmniyyət icod kardeyro bə Sionist rejimi xatircəm nıbun.

Ostoro şəhrıstoni cımə İmom, Ərəbistonədə 81 nəfəri cəmi surəti edam kardey ki çəvonku xusuxi 41 nəfər şiə beqınohə kəsonku bin, məhkumış karde iyən votışe: ım hərəkət nışoş do ki ijən Ərəbistonədə coheliyəti fikon hakime və əqə bəşər həxon iyən beynəlxalğ huğuğiku himoyə əkəyon həxi dumoədən, bəpe Ukrayna və Ərəbistoni şahrvandon barədə 2 curnə standardon nışo doeyku bə kəno bıbun.

Ostoro cımə İmom ijən bə nuyə sor və təbiəti bəhari nez bey xoto təbrik votışe və əlovəş karde: təbiəti əvəz bey, Xıdo zumandəti nışonəy əmmo çok ıme ki çəmə dılon hol-həvo əvəz kəmon iyən bevəcion, ixtilafon və kin-kudurətonku diyəro bımandom.