Masalədə Nəvuzə idi adəton iyən hol-həvo(2)

Əzizə əməson, Nəvuzə id, həmmə milləton xususi Tolışonro bənə qıləy kanə, torixi iyən erjinə adət və mərosimi zıney bıdə.

Nəvuzə idədə iyən bəharə fəsli rujonədə şıməro ğəşənqə ləzəon iyən jimonədə xuşbəxtiyəti urzu kardəm.

Dəvət kardəm ki dəmə bə ico bımandən iyən ımrujnə xəbə reportaji bıməsən.

Bənə İroni həmmə ğovmon, Tolışon həm bəharə fəsl və nuyə sori çı tojəti iyən sənibəton bəji bey faxti zıneydən.

Xususi Masalıjon ın barədə və həminə tojəti və tojə bey oşko surəti nışo doeyro Nəvuzə idi bənə çokə fırsəti bə hisob vardən.

Əmmo İroni Masalədə millət Esfəndə manqi oxonə rujonku de cur bə curə adəton vositə nəvuzə id iyən bəharə fəsli vey çok dəvoniyeyro ıştəni hozzo kardeşone.

Məsələn Masalıjon Nəvuzə idi bənav kali dionədə divoon de tojə sıməynə qıli təmir iyən ranq kardən.

Sıməynə qılədə miğdori kıləş ya bırzi şartuk heste ki çəy məteryal de ovi bə əməl omeydə iyən hozzo bey bəpeşt, divoon ranq jəe və təmir kardeyro çəyku istifodə bıdə ta kə divoonədə bıə ləkkə və siyohə bevəciyon puşniye bıbun.

Əmmo Qillon ostanədə de Nəvuzə rujon həmzəman, i tərəf Koronavirusi pandemik şəroyet dəvom kardeydə və co tərəf dəvardə rojonədə bıə şiddətinə voş, həvosəti bənə zımston vey sardinış kardə, və hol ım ki bəharə fəslədəmon.