Masalədə Nəvuzə idi adəton iyən hol-həvo(6)

Xosə tolışon səlom, Nəvuzə idi ğəşənqə ləzəonədə şıməro xoşbəxtiyəti urzu kardəm.

Imrujnə xəbə reportajədə həm bə İroni tolışon miyono bıə Nəvuzə idi adət-ənənonku qıləyni işorə bəkamon.

Nuyə sori rujonədə colibə ğədimi rəsmonku qıləyni Nuruz numə handeye.

Mehribonon, Nəvuz numə əhandon, çı Nəvuzi çavuşi handə kəson, şəvədə oğo mandə kəson, bəharə fəsli mıjdəvonəti doə kəson iyən şoəti mesaji pevlo kardə kəsonin ki Nəvuzə manqi əvvəliku ıştə koy bino kardən iyən tosə kulçuşəmbə iyən hətto idə şəvi oxo bəştə fəaliyəti dəvom doydən.

Nəvuz numə xuni qıləy kollektiv ko heste ki adətən 3 nəfəriku şomil bıdə ki çəvonku har kəs təyin bıə məsuliyəti əncom doydə.

Har ruj iyən həvo tok bey zəmonədə, Nəvuz numə əhandon dion və kuçəonədə ıştə koy bino kardedən.

Kə soybon həm pul, bırz, ğənd, quyəve və kaqə moğnəon bənə idəbaxşe bə əhandon doydən, Nəvuz numa handə kəson həm kə soybi idəbaxşe əvəzi, qıləy qədə şimşori toğə bədon, iyən kəsoybiro xəyrə dıvo kardən.

Vote lozime ki, Tolışə millət, şimşorə do, qıləy muğəddəsə do iyən vişəonədə həminə do vırəon vey mıtəbərrikə məntəğə zıneydən.

Tolışədə Nəvuz numə əhandon şeronku qıləyni jeğo handey bıdə:

Bəharə fəsli vaxte, bılbıl nəğmə handedə

Şoəti vaxt oşko bıə, dustun, nəvuz omedə.