Masalədə Nəvuzə idi adəton iyən hol-həvo(9)

Əzizə əməson səlom, Nuyə sor iyən bəharə fəsli rujonədə şıməro ğəşənqə ləzəon iyən jimonədə xuşbəxtiyəti urzu kardəm.

Mehribonon, Nəvuzə id, həmmə milləton xususi Tolışonro bənə qıləy kanə, torixi iyən erjinə adət və mərosimi zıney bıdə.

Jəğo ki işorə kardemone, Tolışə millət həm bənə İroni co ğovmon, Nəvuzə manqədə çəvon dılədə şovğ iyən şoəti vindey bıdə ki sori əvəz bey ya xod təhvile sal zəmonədə bəştə pik noğtə bərəse.

Nuyə sori bino bey zəmonədə ailəon har çəxtə ki zuşon bıbu, ıştə Nəvuzə surfə ranqin, kanə oləton de tojə oləti əvəz, və kə zohiri ğəşənq kardən.

Tolışə xalığ de nuyə sori həmzəman ıştə dılon noxəşi yodiku bebəkan və fəğət bə mehr iyən dustiyəti fik kardən.

Nəvuzə idə rujədə, Tolışon surfəonədə məhəliyə xavlo, mivə, acil, obıştə taxıl və donəon mıvcudin iyən çəvon 7 sini surfə kənoədə ğeyçi, ovəynə iyən kərimə Ğıron həm vindey bıdə.

Nəvuzə rujədə, xorək bərəkətinə surfəon hevujin və har kəs ki oşno ya xod noşınos bıbu çı kə əholi və surfə kənoədə bə xorək hardey məşğul bəbe.

Həmçınin ehtiyocinə şəxson və fəğiron bə har kə ki varid bıbun, kə soybiku, pul ya xod idəbaxşe sey bəznın, boçi ki tolışə xalğ Nəvuzə idi çı məhəbbət, komək iyən ehsoni id bə hisob vardeydə.