Qilonədə Nəvuzə turiston mandey iyən məskun bey 140 faiz əlovə bıə.

Əzizə həmzıvonon səlom, şımə Nəvuzə id mıburək bıbu, bəhari ğəşənqə rujonədə şıməro səloməti və xoşə ləzzəon urzu kardəm, dəvət kardəm dəmə bə ico bımandən və bə ımrujnə xəbə reportaj baxşi quş bıdənən.

Əzizon, Qiloni dasti sənaye, turist və mədəniyə irson idorə yol, Nəvuzə idiku tosə bə ısət ostanədə har şəv 1 milyon nəfəriku vey turisti məskun beyku xəbəş do.

Bə İRİB raporti əsos, Vəli Cəhani votışe: dəvardə sori Esfəndə manqi 25 minnə rujiku tosə bə ısət, Nəvuzə turiston, Qiloni daimi və mıvəğğətə muxtəlifə məskun bıə mərkəzonədə turiston mandey miğdor, dəvardə sori muğaisədə, 140 faiz əlovə bey nışo doydə.

Əv tosə ımruj bə Qilon Nəvuzə səyohətəkəyon varid bey miğdori 5 milyono 151 həzo 913 nəfər elanış karde və əlovəş do: ın statestika dəvardə sori muğaisədə 39 faiz əlovə beyku hikoyət kardə.

Qiloni nəcimə sənaye, turist və mədəniyə irson idorə yol ijən votışe: həminə zəmonədə bə Qilon varid bıə maşinon həm 1 milyono 1435 qılə be ki dəvardə sori muğaisədə, təğribən 37 faiz əlovə bıə.

Vəli Cəhani həmçınin izhorış karde: tosə bə ısət təğribən 300 nəfər xarıci turist həm bə ostani turistik və torixiyə vırəon osə ğandəşone.

Qilon ostanədə 3 həzo 235 qıləku vey turistik iyən səyohətəkəyon məskun kardə vırə heste.