Qilonədə moy qəte fəsl tosə Fərvərdinə manqi 20 dıroz bıə.

Xosə Tolışon səlom, şımə nımuj-rujəon ğəbul bıbu, ım mıburəkə rujə moədə, Xıdo dərqohədə şıməro xəy, səadət və məğferəti tələb kardəm.

Dəvət kardəm bə ımrujnə xəbə reportaj baxşi quş bıdənən.

Kaspi dıyoku, tosə Fərvərdinə manqi 20 minnə ruji, astə moyon qəte imkon bəbe.

Əzizə həmzıvonon, bə İRİB raporti əsos, Qiloni moyəvonəti idorə sərpərəst, tosə Fərvərdini 20 minnə ruji, moy qəte fəsli dıroz beyku xəbəş do iyən elanış karde: həmmə soron, Mehr manqi 15 minnə rujiku, Kaspi dıyoku astə moyon qəte fəsl bino bıdə iyən tosə Fərvərdinə manqi 15 minnə ruji dəvomış bəbe, əmmo ımsor ın mıddəti tosə Fərvərdini 20 minnə ruji dıroz kardımone.

Həmid Rıza Nəsiri əlovəş do: Mehr manqi 20 minnə rujiku tosə ımsornə sori Fərvərdinə manqi 10, Qiloni 47 qılə səyyodəti şirkəton 1415 ton muxtəlifə astə moyon qəteyro muvəffəğ bin.

Əv ijən votışe: çı qətə moyon veyni sıpiy iyən kəffali şomil bıdə ki təğribən sıpiyə moy miğdor 53 faiz, yəni 753 ton iyən kəffoli miğdor 44 faiz yəni 617 ton heste. səyyodon 45 ton həm co moyon dıyoku qətəşone.

Qiloni moyəvonəti idorə sərpərəst ijən izhorış karde: jığo votey bıdə ki qətə moyon həvote erj, təğribən 1680 milyard riyol bəbe.