Qiloni ğəyre nat ixracat, 720 milyon dollariku vey elan bıə.

Mehribonon səlom, mıburək Rəməzonə manqi rujonədə Xıdoku şıməro səadət iyən məğfirəti tələb kardedəm, dəvət kardəm bə ımrujnə xəbə reportaj baxşi quş bıdənən.

Qiloni sənaye idorə mudir votışe: dəvardə sorədə, Qiloni ğəyre nat ixracat 720 milyon dollar təyin bıə be ki de Qiloni taciron səyo cəhdi, çəy miğdor 730 milyon dollariku həm vey be.

Bə İRNA raporti əsos, Teymure Purheydəri, dəvardə sori mıddətədə bıə Qilon ostani ixracat erji əlovə bey miğdori, 10 faiz elan kardışe.

Əv izhorış karde: de icbor bıə şiddətin iyən zalimonə sanksiyaon vıcudi ixracati bə inkişof rosniye, bə ğədrdonəti loyiğ bıə ko bə hisob omeydə.

Purheydəri, dəvardə sorədə Qilon ostaniku ixrac bıə muhimmə məhsulon, nəbati, məədəni, xorəkə iyən plastik məhsulon elanış kardə ki bə kişvəroni bənə Rusiyə, Azərbaycan və Qurcıstan sadir bıə.

Purheydəri ijən votışe: ixracat sahədə ko kardeyro Qiloni taciron meyl vey ziyod bıə ki çəy nəticədə Ostanədə ticari mıbodiləon iyən sadiroti əlovə bey şoydimon.

Qiloni sənaye idorə mudir əlovəş karde: Qiloni ticari mıbodiləon bə inkişof rəseyro vey zərfiyəton mıvcudin, fəğət bəpe infrastrakturon iyən dıyo və portonədə bıə imkanaton bə inkişof bırəsi.

Qilon çı Kaspi dıyo kişvəron kənoədəy ki zəmini, dıyo iyən reyls xəttonədə nəğliyot imkanaton soyb bey xoto, ticorətiro veyə zərfiyətış heste.