Çı Qiloni bicoronku 29 həzo hektari bimə kardey.

Əzizə Tolışon səlom, şımə ruj bə xəyr bıbu, umidımon heste mıburəkə Rəməzanə manqədə şımə nımoj-rujəon iyən ibodəton ğəbul bıbun, dəvət kardəm bə ımrujnə xəbə reportaj baxşi quş bıdənən.

Qiloni ditəsərrufat idorə bimə koon mudir, ım ostani kaştemoni zəminonku, 29 həzo hiktori bimə kardeyku xəbəş do.

Bə Qiloni Tele-Rədio aqentiyəti raporti əsos, Peymane Əbdullahifər, bə Qiloni bicoron bimə bey əhəmiyyəti işorəş karde iyən votışe: tosə bə ısət 34 həzo nəfər çı Qiloni fermeron, 29 həzo hiktor ıştə bicoron bimə kardışone.

Peymane Əbdullahifər, fermeronku tələbış karde ki tosə Ordibehştə manqi oxo, de bə Qiloni ditəsərrufat idorə bimə baxşi muraciət kardey vositə ın koy fırsətiku istifodə kon.

Əv ijən bə ım məsələ işorəş kardə ki fermeron karde bəznen ıştə bicoron kredit surəti bimə kon.

Əv votışe: 46 həzo nəfər çı Qiloni fermeron ıştə məhsulon bimə kardəşone ki mol, pərəndə, kaştemoni zəmin iyən moyə məhsulonku şomil bıdə.

Dəvardə sorədə, 48 həzo 677  nəfər çı Qiloni fermeron, muxtəlifə hadisəon vədə 42 həzo hiktor ıştə zəminon bimə kardışone ki 50 milyard tımən bə əvon ziyon əvəzi doə bıə.