Ğuds beynəl xalğə ruj, inğilobi yolə memori erjinə irs.

Əzizə həmzıvonon səlom, Xıdo dərqohədə şımə taat və ibodəton ğəbul bıbun, əzizon ın şanqo de Əhle Beyt(ə)-i kərim, İmom Həsən(ə)-i milad şəvi sorəqardışi bərobəre ki ım əziz iyən bərəkətinə şəvi bə şımə xıdmət təbrik ərz kardedəm. şıməni dəvət kardəm bə ımrujnə xəbə reportaj baxşi quş bıdənən.

Qiloni islami təbliğon həmohənqəkə şura rəis votışe: Qilonədə Ğuds ruji əzəmətin bərpo beyro, 120 qılə təklif və roy bəyon bıə.

Bə Qiloni Tele-Rədio aqentiyəti raporti əsos, Ğuds beynəl xalğə ruji yol qəte iclosədə, Qiloni islami təbliğon həmohənqəkə şura rəis votışe:  İslami inğilobi yolə memor, İmom Xomeyni(r)-i erjinə irsi, yəni Ğuds ruji yol qəteyro, de diğğət bə şəroyet iyən Korona virusi pandemiya , 120 qılə təklif iyən roy bəyon bıə, əmmo əqə  virusi ranqi cəhəto şəhron şəroyet, əvəz bıbu, bənə dəvardə 2 sori, aksiyaon, maşini surəti bərpo bəbe.

Huccətul İslam Muctəba Əşcəri əlovəş do:  Ğudsi beynəl xalğə ruji nışo doey, iyən Fələstini məzlumə milləti vədə mısılmonon, məsuliyəon təbyin kardeyro, bəpe fəğət bə aksiya rozi məbəmon, bəlkəm karde bəznemon de muxtəlifə zərfiyəton, bənə məçiton, , məktəbxonəon, universition, sosiyal şəbəkəon iyən hınə sahəku istifodə kəmon.