Ostoroədə bırzi təvafuği surəti kaştey plan.
Əzizə duston səlom, şımə ibodəton ğəbul bıbun, ımrujnə xəbə reportaj baxşi bə şımə xıdmət təğdim kardəm.
Ostoro fərmondar, bırzi zəmanət hıryey barədə dıvləti tərəfo vəədəonku xəbəş do iyən votışe: ım muhimmə koy əncom doeyro, ditəsərrufat cihodi tam fermeronku himoyə bəkarde.
Enayəte Rızaipur de İrna jurnalisti votımonədə votışe: bırzi təvafuği surəti kaştey plan vujuriku dəllolon miyoniku bardey, bırzi zəmonət hırye iyən istehsoli bə inkişof rosniyeyro fermeron ənqizə əlovə kardey bois bəbe.
Əv ım şəhrıstoni ditəsərrufat cihod idorə iyən fermeronku tələbış kardə ki de fırsətiku istifodə kardey ditəsərrufat baxşədə tojə hərəkəton əncom bıdən iyən bəştə şəhrıstoni iğtisod komək bıbun.
Həminə cəhətədə, Ostoro ditəsərrufat cihod mudir həm, bırzi təvafuğ surəti kaştey plani məziyyəton barədə votışe: ım plan de ditəsərrufat cihod idorə koməki iyən de bırz stratejik məhsuli kaştey iyən fermeronku himoyədorəti kardey hədəfi əncom bıdə.
Sasan Karcoyan əlovəş do: ım plani icraədə vey krediton iyən lozimə şəroyetoni bənə isloh bıə donəon, qubrə, aləf əkıştə zəhrə iyən ərazi bepulə biməonku istifodə kardey fermeronro hozzı bıə ki krediton çı istehsuli bəpeşt məhsuli ğəymətiku kam bəbe.
De çokə ğeyməti bırzi həvotey, məhsuli keyfiyəti rost kardey, bırzi kaştey iminnə məteriyalon iyən donəon təmin kardey, istehsolədə stabileti iyən kaştemonədə bepulə texniki məşvirətonku istifodə kardey çı bırzi təvafuği surəti kaştey plani co faydonku elan bıə.
Ostoroədə, 3 həzo nəfəriku vey fermer heste ki dəvardə sorədə 14 həzo ton bırzə şəltuki istehsol kardışone.