Qiloni 1000 qılə məzhəbi heyət iyən məçiton, ğədrə şəvon mərosimonku mizbonəti kardən.

Əzizə əməson səlom, şımə ibodəton ğəbul bıbun, dıvo kardəm Rəməzanə manq iyən çəy ğədrə şəvonədə, Xıdovənde Xalıği məğfirət, baxşış iyən rəhmət bə şımə ğısmət bıbu, əzizon Həzrəte Əli(ə)-i şəhodətə rujon bə şımə xıdmət təsliyət ərz kardəm.

Dəvət kardəm bə ımrujnə xəbə reportaj baxşi quş bıdənən.

Xosə Tolışon, Qiloni islami təbliğon mudir votışe: ostani 1000 qıləku vey məzhəbi heyəton, məçiton iyən huseyniyəonədə Ğədrə şəvi mərosimon de Koronavirusi protokolon rioyəti bino bıə.

Bə İrna raporti əsos, Huccətul İslam Səed Məhdəvi bə ım nuktə işorəş karde ki Ğədrə şəvon mərosimon bərpo kardeyədə, iminnə şərt, ojə fəzoədə mərosimon dəvoniye heste, əlovəş do: de həmohənqion bərobər, mərosimon məktəbxonəon, parkon iyən umumi vırəonədə həm dəvoniyey bıdə.

Qilon ostani islami təbliğon mudir Ğədrə şəvonədə, bə milləti ehsonon işorəş karde iyən votışe: bə Koronavirusi ğərorqo protokolon iyən prinsipon əsos, millət bəpe ıştə humanitar koməkon pəketon ğolibədə hozzı iyən pəxş kon və ictimai fasiləon həm rioyət bıbu.

Əv məzhəbi mərosimon bərpo kardeyədə, bə Qiloni tib elmon universiti iyən mıolicə kadri miyono çokə həmkarion işorəş karde iyən əlovəş do: tovsiyə bəbe ki ım şəvonədə milləti maliyə koməkon çı mıolicə iyən zindonion ozod karde baxşədə bıbu.

Zinə şəv Rəməzan mıburəkə manqi 19 minnə şəv iyən ımsornə sori Rujə mo iminnə Ğədrə şəv be.