Ostoro cımə nımoji xutbəon.
Əzizə Tolışon səlom, Həzrəte Əli(ə)-i şəhodətə rujon bə şımə xıdmət təsliyət ərz kardəm, əzizon ın şanqonə Rəməzanə manqi 23 minnə şəv iyən oxonə ğədrə şəve, dıvo kardəm ım əzizə şəvədə, Xıdovənde Xalıği baxşış iyən inoyət bə şımə ğısmət bıbu.
Dəvət kardəm bə ımrujnə xəbə reportaj baxşi quş bıdənən.
Xosə Tolışon, dəvardə haftə Ostoro cımə nımoji xotbəonədə, Huccətul İslam Muhəmməd Cəvad Bağıri bə şiəyon i minnə İmomi şəhodətə əyyomi işorəş karde iyən votışe: bə ictima fəğiron iyən ehtiyocinə şəxson diğğət kardeədə bə Həzrəte Əli(ə)-i jimoni səbk iyən şivə əməl kardey, çı viloyət və imoməti nəzdədə bıə əməliyə mıhəbbəti royədə vey çokə sirə bə hisob omeydə ki həmmə kəson xususi hukuməti rəsmi şəxson bəpe bəy əmol kon.
Əv bə İron İslam Respublika ərtış ruji, və İslami inğilobi sepah təşkilati təsis sorəğardışi yol qətey mərosimon işorəş karde iyən votışe: ərtış və sepah, inğilob iyən rəhbəriyəti zumandə dastonin, və sepah iyən ərtışi ğəyrətmandə mırdon, həm marzon əmniyyəti oqətey və həm saxtə rujonədə de muxtəlifə xidməton bə İroni əzizə milləti komək bin və çəmə mınnətdorə millət həm həmişə əzizə sepah və ğəyrətmandə ərtışi xidməton ğədri zıneydən.
Huccətul İslam Muhəmməd Cəvad Bağıri bə Guds beynəl xalğə ruji nez bey xoto, millət iyən rəsmi şəxsonku tələb kardışe ki deşətə iştiroki vositə, ijən co qılə əzəmətinə ğəhrəmonəti icod kon.
Əv ijən əlovəş do: Ğudsi aksiyaədə iştirok kardey vey muhimm məsələy iyən 2 sor Koronavirusi tətilion bəpeşt, ım aksiya bənə dəvardə soron hərorətin bərpo bəbe.
Ostoro cımə İmom bə Fələstinədə bıə tojə təhəvolaton iyən sioniston zidd muğavimət cərəyoni mubarizəon dəvomi çı Fələstini ğəyrətmandə cıvonon oğoətiədə vey təsirinə hərəkət bə hisobış varde.
Huccətul İslam Muhəmməd Cəvad Bağıri ijən bə İsveçədə bıə Rəməzanə mıborəkə manqədə, kərimə Ğıroni otəş jəe ki de anti din qurupon vositə əncom bıə, işorə və ım bevəcə ihonətomizə hərəkəti məhkum kardeşe və votışe: bə kərimə Ğıroni beehteromətəti kardey ki de bəyonədə ozodəti bəhonə əncom bıdə, dınyo 2 milyard mısılmonon dıli bə dard vardəşe.
Əv təkidış be ki ğərbion Avropaədə İslami ozavziyəku vey niqəronin əmmo bəpe aqah bıbun ki ım hərəkət, dınyoədə islam dini çimisə hevujəti bois bəbe.
