Qilonədə Ğuds beynəl xalğə ruji aksiya.
Mehribonə əməson səlom, Rəməzan mıborəkə amnqi oxonə cımə, Ğuds beynəlxalğə rujədəmon.
Imruj çı Fələstin məzlumə millətiku himoyədorəti karde simvol bə hisob omeydə iyən Qiloni Tolışə məntəğəonku rəsə xəbəon jığo hikoyət kardə ki millət 2 sor Koronavirusi pandemik şəroyeti bəpeşt millət ijən ıştəniku ğəhrəmonəti və hərorətinə iştiroki nışo doəşone.
Imruj ,Urdibeheştə manqi 9, Aprilə manqi 29 minnə ruj iyən Rəməzanə mıborəkə manqi oxonə cımə ruje ki bə İroni islamiyə nizomi təsisəkə, mərhum Həzrəte İmom Xomeyni(r)-i tədbiri əsos, Ğuds beynəl xalğə ruj nom noə bıə.
Imrujnə ruji Ğuds beynəl xalğə aksiyaədə Tolışə xalği iştirok nışoş do ki Fələstini millətiku himoyədorəti kardeyədə dınyo mısılmonon vəhdət, bənə bə istikbori dıl qıləy zəhrinə ti ğandey mandə.
Xosə əməson, Qilon ostan xususi Tolışə şəhron iyən vırəonədə həm, ım aksiya yol, əzəmətin iyən hərrorətin surəti bərpo bıə.
Imruj Ğuds beynəl xalğə ruji aksiya, de səhiyyəvi protokolon rioyəti saət 10:30 iyən de Qiloni rujə əqəton iştiroki ostani həmmə vırəonədə bino be.
Bə İrib raporti əsos, ımruj Ğuds beynəl xalğə ruji aksiyaədə Qiloni viloyətmədor iyən dindorə millət, de rujə zıvoni, tojədən deştə əzəmətin və hərorətinə iştiroki vositə subit kardışone ki dınyo mıstəzəfon və məzlumə millətonku himoyədorəti kardedən iyən Şərifə Ğuds və Fələstini ozodəti bənə ıştə əsli hədəf və simvoli ijən yodədə oqətəşone.
Taleş, Rizvonşəhr, Əsolım, Şandırmən, Masal iyən Fuməni tolışə məntəğonədə bıə ımsornə sori Ğuds beynəl xalğə aksiyaədə iştirok əkəyon deştə mitinqon vositə Fələstinədə bıə sionist rejimi cinoyəton məhkum kardey kənoədə bə islam dınyoədə bıə şərifə ğudsi mehvər bey iyən Fələstin ışğal bıə əraziədə muğaviməti dəvom təkid kardışone.
1358 minnə sorədə, İroni islamiyə nizomi yolə memor, Həzrəte İmom Xomeyni(r), bə dınyo həmmə mısılmonon vığandə qıləy mesajədə Rəməzan mıborəkə manqi oxonə cımə ruji bənə Ğuds beynəl xalğə ruji nom noşe.
Im tədbiriku hədəfi, Fələstini sıtəm vində məzlumə millətiku himoydorəti, Sionist be ğanunə rejimi cinoyəton iyən təhdidon vədə Ğuds intifozə zumandəti, bə ın rejimi ələyh cəhbə təşkil doey, israili məhv kardero lozimə zəminəon icod kardey iyən bə məzlumə Fələstinıjon komək kardeyro mısılmonə milləton vəhdət elan bıə.
