Çı Ostoro 3 qılə marzonku əmtəə tranzit, 37 faiz əlovə bıə.

Mehribononə əməson səlom, Rəməzan mıborəkə manqi oxonə rujonədə, Xıdovənde Xalıği dərqohədə şıməro xəy, səadət iyən məğfirəti urzo kardəm, dəvət kardəm bə ımrujnə xəbə reportaj baxşi quş bıdənən.

Ostoro qomrok idorə yol elanış kardə: Fərvərdinə manqədə Ostoro zəmini, dıyo iyən reyls xətton marzonku, 13 həzo 751 ton məhsul iyən əmtəə de 18 milyono 33 həzo dollar erji, ixrac bıə, ki ım miğdor dəvardə sori muğaisədə vəzni cəhəto 37 faiz əlovə bey nışo doydə.

Bə İrna raporti əsos, Səid Naderi votışe: ım miğdor əmtəə, çı Ostoro qomrokiku bənə iminnə qomroki tranzit bıə, ijən Fərvərdinə manqədə 16 həzo 348 ton məhsul de 43 milyono 784 həzo dollar erji, xarıci qomrokonku bə Ostoro qomrok bənə məğsəd qomroki tranzit bıə ki dəvardə sori muğaisədə vəzni cəhəto 58 faiz əlovə bey nışo doydə.

Əv bə əmtəə tranzitədə Ostoro qomroki rol işorəş karde iyən əlovəş do:  Fərvərdinə manqədə 1 həzo 73 ton məhsul və əmtəə de 8 milyono 311 həzo dollar erji, Ostoro qomrokiku bə daxıli qomrokon tranzit bıə .

Naderi Ostoro 3 qılə marzonku ixracati miğdori barədə votışe: Fərvərdinə manqədə 62 həzo 81 ton əmtəə iyən məhsul de 36 milyono 268 həzo dollar erj ixrac bıə.

Naderi Ostoro qomrokiku ixrac bıə məhsulon, kaştımon, nat kimiya, məədəni, plastik, kaşi, seramik məhsulon , muxtəlifə sığəon, şıti məhsulon və muxtəlifə moy elanış kardə, və votışe: ım məhsulon veyni bə Azərbaycan Respublika ixrac be.

Ostoro qomroki yol həmçınin Fərvərdinə manqədə, bə Qilon 8 həzo 576 ton məhsul və əmtəə  varid bey işorəş karde iyən əlovəş do: ım məhsulon və əmtəə erj 6 milyono 797 həzo dollar be, ki dəvardə sori muğaisədə vəzni cəhəto 29 faiz, və iğtisodi erji nəzəku 10 faiz kam bey nışo doydə.