Qiloni iğtisodi baxşon bə inkişof rəseyro planon.

Əzizə duston səlom, ımruj həm co qılə reportaji bə şımə xıdmət təğdim bəkam, şıməni dəvət kardəm de Tolışi Rədio bə ico bımandən və bə ın baxşi quş bıdənən.

Qiloni ostandar votışe: Qilonədə daxıli iyən xarıci sərmoyə noeyro, iğtisodi bə inkişof rəse şəroyet hozzoe.

Bə İRİB raporti əsos, Qiloni plan kəşey iyən inkişof şura iclosədə, Əsədullah Əbbasi votışe: bəpe Ostani iğtisodi inkişof sahədə bə imkanaton ədolətin surəti təğsim kardey diğğət bıbu.

Ostandar bə Qiloni iğtisodi inkişofi məzənnə işorəş karde iyən əlovəş do: ın mıvzo barədə de səhihə siyosəton iyən investoron cəzb kardey vositə bə hədəfon rəse imkan bəbe.

Əbbasi iğtisodi inkişofədə bə 8 faiz məzənnə dast peydo kardey əhəmmiyəti işorəş karde iyən votışe: Qiloni muxtəlifə planonədə əlovə bə mudiron və fərmondaron, bəpe nımoyəndəon, alimon, universiti ustadon, cıvonon iyən cihodi qurupon nəzəonku həm istifodə bıbu.

Əv dəvardə sori muğaisədə, bə daxıli istehsoli miğdori əlovə bey, fabrikaon əktivə koon, investoron cəzb kardey, istehsoli zəncirə komil bey və bə çəy keyfi əlovə kardey iyən bəkəno mandə zərfiyəton bə meydon vardey məsəlon işarəş kardə ki iğtisodi bə inkişof rosniyeyro bəvon diğğət bıə.

Qiloni ostandar Əsədullah Əbbasi, bə bırzi istehsol, şıtə məhsulon iyən moyəvonəti baxşədəbə bıə Qiloni zərfiyəton həm işorəş karde ki ostani iğtisodi inkişofədə bənə mehvər bəy diyə kardey bəbe.