"Tolışon sədo" rujnomə iminə numrə çe çapo beşə

"Tolışon sədo" rujnomə çəmə milləti mətbu tarixədə məxsusi vırə hestışe.Əv çe mərhum ustad Nəvuzəli Məmmədovi "Tolışi sədo" rujnomə layığinə varise .

2012-minə sori hokuməti Hilal Məmmədovış bə zindon dənoe, ım rujnomən həni çap nıbe.Bəvədə de Rafiğ Cəlilovi təşəbbüs və rəhbərəti "Tolışon sədo" nəşr bino bıe, ısət 6-minə sore ki, əv de Boku hokuməti təzyiğ və maneon vəbəvə mandə, əmo de Tolışə milləti ğıryətmandə fərzəndon təşəbbüs və maddi koməqi ıştə fəaliyyəti dəvom kardedə.Tosə ısət rujnomə 94 qılə numrə bə əhandon təğdim kardəşone.Im 2017- minə sori iminə numrəy.

Rujnomə sıftənə səhifədə bə Seyid Əli Nasiri vəfati dair nekroloq və  bə ım dardinə hadisə Nəriman Tolışi, iyən Bəxtiyar Ruşini nıvıştə şeeron çap bıən.

Rujnomə co səhifonədən çe Camal Lələzoə, Ağşin Dadaşzadə, Allahverdi Bayrami şeron, həmən redaktor Rafiğ Cəlilovi sər məğalə i ğism bə çəmə milləti qiramiə şairi vəfati həsr bıə.

Dıminə səhifə bə Ğurani-Kərimi Fili surə həsr bıə. Im surə nazil bıə tarixi şəraiti, çey tolışi zıvonədə tərcimə və izahati bə əhandon Mehsun Perzəvoji təğdim kardəşe.

Sər redaktor Rafiğ Cəlilov bənə har səfnə ım rujnomə  sər məğalən bə tolışə milləti Az.R -ədə mevcud problemon, hokuməti tərəfo bə tolışə mədəniyyəti inkişafi nişon doə təzyiğ və maneon həsr kardəşe. Mətləb Dadaşov Respublika məmuron tərəfo sodə insonon çı curə oj-oşko ğarət karde barədə bə əhandon məlumat doəşe. Rujnomə səhifonədə xeyli ədəbi-bədii materialon - şeeron, hekayon, lətifonən dərc bıən.

Rujnomə elektron varianti "rafiqcelilovunbloqu" və "azeri.lt" internet resursonədə hande mumkune.