Hokuməti Masəlu rayoni imom cumə Şeyx Sərdar Babayev - Hacıhəsənli dəstqir kardəşe.
Boku hokumət bə dini fəalon divon qətə tədbiron dəvom kardedə. Fevrali 22-ədə Masali rayoni rayoni polison çıvrey imom cumə, Azərbaycan Ruhanion Məclisi uzv, "Maide.az" sayti sər redaktor Şeyx Sərdar Babayev-Hacıhəsənli dəstqir kardəşone. Çimi səbəb əv bıə ki, bə çey cumə nomojon çand sa nəfər qırd əbiy, dey bahəm nomoj əvotin.
Çimku rayoni icra sərdar Rafil Huseynovi bə prokurori şikat kardəşe. Bə ım ğeyri-ğanuniə əməli etiraz karde ro, xeyli əhali bə rayoni prokuratura bina və qırdə bıən. Hokumət de əlavə polis ğıvvon koməqi əvonış tojniə. 4 nəfər foto və video kəşəkəsonşonən bə polis bardə. Məhkəmə əvonış cərimə kardə bəpeşt vadoəşe. Bə Şeyx Sərdari isə de Cinayət Məcəllə 2 qılə maddə ittiham bə nav doəşe ey bə Kurdəxonə təcridxonə vığande nəzərədə qətedən.
Hokuməti bə imon əhli nubətinə repressiya hərəkət məmləkətədə, həmən xaricədə jimon kardə azərbaycanıjon etirazi səbəb bıə. Azərbaycani İslamə Partiya sədri əvəz Haci İlham Əliyev bə "İslamın sesi" sayti votəşe ki, əmə hokuməti bə Haci Sərdari doə ittihami məhkum kardedəmon.
Dini Etiğad və Vicdonə Azadion Mudafiə Mərkəz, həmən İçərişəhər "Cumə" məçiti dini icma bahəm qıley bəyanat pevolo kardəşone, bə ım həbsi ıştə etiraz ifadə kardəşone.
"Milli Mənəvi Molyəton" İctimai İbemoni hokumətiku Şeyx Sərdari sərbəst vadoe tələb kardəşe.
"Maidə.az" sayt Ğırğızıstoni paytaxt Bişkek şəhəri İmom Əli(ə) məçiti imom Hacı İlğari, Moskva şəhəri ruhanion bəyanaton həxədə məlumat doəşe ki, ım şəhəron dini camən bənə Seyx Sərdari momin qıley odəmi İslamə Həmrayəti sorədə dəstqir karde qıley nalayığə əməl hisob kardəşone.
