Vəkili de Şeyx Sərdar Hacıhəsənli vindemon kardəşe
Vəkil Cavad Cavadov marti 1-minə ruji Masalu Polis Şebə təcridxonədə de Şeyx Sərdar Hacıhəsənli vindemonış bıə. Bı barədə "Azadlıq radiosu" sayti xəbə doəşe.
Vəkili votəşe ki, hokumət Şeyx Sərdari de Cinayət Məcəllə 168 -minə maddə - Dini mərasimon dair tələbon darışte səbəbi ittiham kardedə. İmən bə Avropa Bəşəri huğuğon Konvensiya fikir, vicdon və dini ozodi prinsipon zidd qıley əməle. Ey həmən ğeyd kardəşe ki, Təcridxonədə polison Az.R ğanuni tələbonən mutəmadi darıştedən. Şeyx Sərdari de ğanuni həftədə 1 kərə deştə ailə uzvon vindemon karde, 2 kərə dəvon de telefoni qəp je ixtiyar hestışe. Əmo polis bey ım imkanon dodəni. Çey ailə bo eyo conomoj, Ğıroni-Kərim, və digər dini ədəbiyyat bardəşe. Əmo polisi həmonə əşyan bey doeku imtina kardəşe.
Cavadov həmən 4 nəfər ki, bə Şeyx Sərdari dəstqir be etiraz kardə aksiyadə iştiraki səbəbiku bə inzibati həbs cəzo məhkum bıən, çəvonən vəkile. Ey votəşe ki çəvon həbsi barədə məhkəmə ğərariku apellyasiya şikayəti bədo.
Jurnalist Ğurban Cəbrayıli bə "Maide.az" sayti votəşe ki, Şeyx Sərdar mısılmonə aləmədə sandinə şəxsiyyəte. Əv çəmə məmləkəti Beynəlxalqə İslami Rostbemonə təşkilatədə təmsil kardə 2 nəfərədə qıleye. Bə repressiya hədəf bıə odəmon xeyli ğismi çe Cənub requonuku be həmə kəs zınedə. Ehtiyac heste ki, hokuməti ım siyasəti rişon tədğiğ kardə bıbo.
Amerika siyasətşunas Pol Qobli bı rujonədə Boku hokuməti Az.R bə sınniə məmləkət peqordınie niyyəti barədə qıley məğalə nıvıştəşe. Həmonə məğalə "TolishPress.org" sayti dərc kardəşe.
İlham Əliyevi bə məmləkəti şiə əhali divon qətə siyasəti mahiyyəti de İslamə həmrayəti şuari çanədə eparçınie cəhd bıkoən, çey nısığ bə həmə dınyo çok məlume.
