"Tolışon sədo" rujnomə tojə numrə

Martə manqi 14-minə ruji "Tolışon sədo" rujnomə həmkaron ımsornə 2-minə numrə bə əhandon təğdim kardışone. Rujnomə sıftənə səhifədə Tolışə xalqi milli ruf, de rəhmətinə şair seyid Əli Nasiri çılımə ruji munosibəti çe şair Bəxtiyar Ruşini "Çıl ruje" nominə şer çap bıə. Bı səhifədə həmən Liki rayoni Orand diədə qıley ğəzo səbəbiku 5 nəfəri həlok bıe, ım faciədə rayoni vəzifədaron çanədə qınokar be barədən məlumat heste.

Tolışi mədəni intibahi çəmə ədəbi zıvon xeyli bə ğaydə eğandəşe. Əmo, bı koədə təbii ki, hələ problemonən hestin. Filoloqiya elmon doktor Rasim Heydərov bə Tolışi ədəbi zıvonədə sıxanon resə  problemi dair ıştə elmi mülahizon bə əhandon nəzə rosnidə.

Sər redaktor Rafiğ Cəlilov ıştə "Şımıri zəmonə" məğalədə hokuməti tərəfo bə tolışə fəalon bıə təzyiğon, çimi nəticədə  bo tolışə milləti, bo çey mədəniyyəti tale dılısoxt norohət bıə  çanədə tolışə ruşinəfikron tarse,  ım mübarizəku bə kəno okırie barədə ıştə fikron de əhandon baxş kardedə. Bı məğalədə əv qıləy rəssami  ki, Kərbəlo mısibət rəsm karde piəşe, çey həxədə ibrətamiz hədisi bo əhandon nəğıl kardedə.

Çe Tolışə milləti şair, həmən etnoqraf alim Nəriman Əğəzodə Tolışə xalqi bovə və etiğadon həxədə elmi-publisistik məşalən hiç şək ni ki,  rujnomə əhandon de həvəsi bəhanden.

Rujnomədə Ağşin Dadaşzadə "Şəhidi nom mığəddəse", Samir İmanovi əlilon bə cəmiyyəti inteqrasiya problemon barədə məğalonən ıştə vırə qətəşone.

Əhandon  ım numrədə Xanəli Tolışi, Camal Lələzoə, Elxan Zəviləvoji, Mətğoli Cındori, Bəhmən Salehi, Mehsun Perzə şeer və hekayonən hande imkan hestışone.

De rujnomə elektron varianti "rafiqcelilovunbloqu" və "azeri.lt" saytədə oşno bıe mumkune.