Sumğayit şəhri polisxonədə dəstqirbə xonəxo mardə

Sumğayit şəhri əji Sahib Qezəli polisxonədə istə dınyoş əvəz kardə. Hadisə sentyabri 14-də Sumğayit Şəhri Polis İdarə 1-minə polisxonədə qıniə.

Bın barədə “Mudafiə Xətti” inson həxon təşkilati icro direktor Rufət Səfərovi məlumatış pevolo kardə.
Pevolo kardə məlumatədə, 45 sininə Sahib Qezəli sentyabri 14-də şanqovonə saatonədə de narkotik şəkki qətə be votə bedə. Polisxonədə bəy işqəncon doe səbəbiku marde ehtimol kardə bedə.
Dılətonə Koon Vəzarəti mətbuat xıdməti Sahib Qezəli delə mərəziku  marde barədə məlumatış doə. Məlumatədə mardə xonəxo narkotik istifadəkə bey xususi ğeyd kardə bə.
Sahib Qezəli dəstqir kardeədə əçey səpe metamfetamin be iddio kardə bedə.Polisxonədə əçe hol bevəc bə, əv bə mərəzxonə rosniə bıboən, əçe jimoni xilos karde mumkün bə ni. Meyti səpe xəsarət rizon oşko nıbe, de fakti anqıl tədğiği koon bardə be votə bedə.
Huğuğ mudafiəvon Rufət Səfərovi bəyonış kardə ki, Sumqaitədə polison tərəfo qətə xonəxon ləzi bə peş polisxonədə marde iminə kərə ni qınidə. Navkoən joğo holon bən.
Rufət Səfərovi bə yodış dəğandə ki, cəmi 3 manq bə nav – iyuni 14-ku bə 15 ovaştə şəv Sumqait şəhri  hojo bın 1-minə polisxonədə 37 sininə Elvin İskəndərov kıştə bəbe. Bəvədən Elvin İskəndərovi əvlodon əçe polison tərəfo de kue kıştə be bəyonşon kardə be.
Dılətonə Koon Vəzarəti mətbuat xıdməti bəvədə marde səbəb siyociqər serroz iyən delə mərəz nuşuş doə be.