Bo Mısılmon İbemoni Hərəkati rəhbər xonəxonku qıləyni həm hukm handə be

Mısılmon İbemon Hərəkati İdarə Heyəti uzv Ağaəli Yəhyayevi 7 sor ozodətiku məhrum kardə be barədə sentyabri 20-də Sumğayıt şəhər Qonə Cinoyəton Məhkəmədə hukm bekardə bə.

Bə doə hukm əsos, ın dindorə fəal de narkotik ittihomi taxsikor zınə bə.
2023-minə sori avqustə manqi 31-ku dastqirətiədə bə Ağaəli Yəhyayev de Cinoyət Məcəllə 234.4.3 (bo həvate məğsədi kulli miğdarədə narkotik bə dast varde, oqəte) maddə ittihom kardə bedə be. Çın maddə sanksiyədə 5 soriku tosə 12 sori ozodətiku məhrum kardə cəzo heste. Məhkəmə hukmədə ittihom bə 234.1-1 (bo həvate məğsəd nı be kulli miğdarədə narkotik bə dast varde, kırniye, oğəte) maddə əvəz kardə bə. Çın maddə sanksiya 3 soriku tosə 8 sori cəzo nəzədə qətə bedə.
Yəni hakimi ittihomiku  həvate məğsədış bekardə.
Əmmo Ağaəli Yəhyayev ıştəni taxsikor zınedə ni, narkotik ittihom saxta be, əv de şər ğande dastqir kardə be, bə fiziki işqəncon, psixoloji təzyiğon məruz mande bəyonış kardə.
Ağaəli Yəhyayev sentyabri 20-də məhkəmədə nav hukmi istə oxonə sıxanədə votəşe ki, Azərboyconədə diktatura rejime, hiç qılı cinoyət nıkardə insonon bə siyosi mevğe, dini bovə, ozod fiki ro de şər ğande dastqir kardə bedən: “İnsonon həxə sədo tosniye ro dastqirətiyon bə jimon dəvonə bedən, hakimonən bin koy vositəti kardən…”.
Hakim bə Ağaəli Yəhyayevi oxonə sıxani bə şə je imkonış doə ni, əçe sıxanış bıriyə, bə mışavirə beşə. Ləzi bə peş, çe mışavirəku oqardə hakimon kolleqiya ittihomi de Cinoyət Məcəllə 234.1-1 maddə əvəz be və əçe 7 sor ozodətiku məhrum kardə be elonşon kardə.
Ağaəli Yəhyayev navədən, 2015-minə sori Nardaran hadison fəxt dastqir bəbe. 4 sor dastqirətiədə oqətə bəpeşt de əfv sərəncomi bə ozodəti vadoə bəbe.
2015-minə sori Nardaranəda Mısılmon İbemoni Hərəkati sərdor Taleh Bağırzadə iyən tərəfdoron vəynə dəvonə polis əməliyyati nəticədə 4 kəs dindor, 2 polis xonəxonən ğətl kardə bə be.
Huğuğ mudafiəvonon hojo ımsor azərboyconədə 500 kəsisə ziyod dindor fəalon dastqir be votedən.
Mısılmon İbemon Hərəkati sərdor Taleh Bağırzodə iyən 70-sə ziyod uzv holiədə dastqirətiədəy.
Dastqirbəyon veyni de narkotiki ittihom  bən.