Əliyevi 58 konqresmeni ovardemoniku qəpış je

Azərboycon devləti rəhbər  İlham Əliyev Amerikə İbə Ştaton Konqresi 58 konqresmeni bə Devlət Departamenti ovarde reaksiyaş doə .

Əliyevi bın barədə oktyabri 4-də bə Cəbrayil rayon kardə səfəri fəxt votəşe.
Əy, ın ovardi bə Azərboyconi vəynə deşmənəti be bəyonış kardə:
“Az maştəvo bə ovardim diə karde, qılı çırkinə ovarde , bə çəmə irodə təsir karde əzıni. Əmmo ım, bə çəmə vəynə deşmənə siyosəti oğətə nıbe nuşu dodə”.
Oktyabri 3-də Amerikə İbə Ştati  58 konqresmen bə Devlət katib Entoni Blinken ovardən.
Əvon Amerika İbə Ştaton omə manq Bokuəda dəvardə COP29 iqlim konfransi yığınəğədə inson həxon mıdafiə və həmmə siyosi məhbuson ozod karde ro bə Azərboyconi Prezident İlham Əliyevi təzyiğ karde vanq kardəşone.
10 senator, 48 Numayəndon Palata uzv bə qrup Blinkeniku  Azərboyconədə həmmə siyosi məhbuson ozod karde məğsədi tədbiron vinde, həmən bə Ermənistoni vəynə təxribot xarakterin bəyonaton doe oğətə be piyəşone.
Əliyevi, bın ovardmoni ro Amerika İbə Ştaton Devlət katib Entoni Blinkeneş ittihom kardə:
“Bə ovardemoni diyə kardeədə az təxminım karde ki, hojo çimi muəllifiən, unvonən iye. Çumçoko çimi unvon Amerika Devlət Departamenti devlət katibe. Əmmo bə mıku hıç qılı şəkk ni ki, ın ovard Amerika Devlət Departamentədə nıvıştə bə. Yəni istən bə ıştə məktub nıvıştən, bəmə tars ome, əməni ittihom karde ro”.
Bə ovardemoni səbəbon qınyə Əliyev, Amerika İbə Ştatonış Əfğanıstonədə bə işğolqərə fəaliyyoti ro ittihom kardə:
“Çumçoko çəvon Əfğanıstonədə işğolqərə fəaliyyot bino bə be, işğolqərə muharibə bino bəbe və bəmə ehtiyocşon hıst be. Çanəndə əvon Əfğanıstonədə bin, ha sor ın sanksiya Amerika Prezidenti tərəfo ros kardə bedə be. Əvon ki çe Əfqanıstoni vitin, – həmmə dınyo çəşi vədə, – ın sanksiyon ikərən bə çəmə vəynə tətbiğ kardə bin. Çın nunkuəti dərəcəş hıçte, ya ne?!”.
Əliyevi, bə Ğərbi unvonən xeyli təngidə fikonış votə.