Taleh Bağırzadə bə Meydan TV vəynə repressiya məhkum kardəşe

Mısılmon İbemon Hərəkati sərdor, 9 sore ki, dastqirətiədə bə ilahiyyatəvon Taleh Bağırzadə 12 numrəninə Cəzokəşə Muəsisəku Azərboyconədə bə de oxonə dastqirətiyon band namə nıvıştəşe.

İlahiyyatəvoni  dastqiryətonış məhkum kardə və hakimiyyətiku həmmə siyosi məhbuson ozod karde tələb kardəşe:
“Həftə mənzərədə ozod media oxonə xolon- Meydan TV 6 uzv, inson huğuğon hifzi ro mucadilə bardə Rufət Səfərov iyən Azər Qasımlı barədə cinoyət ko bino karde, çəvon de şər ğande dastqir kardə be, vəziyyəti çanəndə bə bevəcə hol eqıniye, idorə karde bə tənəzzuli oxonə hədd rəse nuşu doydə. Əqəm dastqirəti ənəndə beəmon və besərhədə hol eqıniyəbusə, bəvədə ın rejim ıştə oxonə mərhələ jidə. Tarixən hələ jəğo qılı devlət bə ni ki, bə ıştə mərdumi zulm karde istə hakimiyyəti oğəte bızno”, – ilahiyyatəvoni bəyonış kardə.
2015-minə sori noyabriku Nardaran hadison ro dastqir kardə bə Taleh Bağırzadə 20 sor ozodətiku məhrum kardə bə.
Əv, polison kışte, terrorəti, beğanuni silah-sursat oğəte və de əlidə qonə ittihomon taxsiko zınə bıboən, ın ittihomon hiç qılə ğəbul kardə ni, de sifarişi dastqir be bəyon kardə.
İlahiyyatəvon bəyon kardə ki, Nardaran əməliyyatədə bə ğətl rosniyə 4 kəs Nardaranovoj iyən 2 polisi marde məsuliyyət əməliyyat dəvonə Mıtəşəkkil Cinoyətkorəti Vəynə Mıbarizə İdorə qiyədey .
Taleh Bağırzadə iyən de əy bə ico muhakimə bə xonəxon “Bandotdel” nominə idorədə oğətə mıddətədə bə ağıli dənıvıjqiyə işqəncon məruz mandən.
Taleh Bağırzadə ıştə 20 sorinə cəzo 7 sorış Qobustan dastqirxonədə kəşə.
Holiədə, Mısılmon İbemoni 70-sə vey uzv dastqirətiədəy.
Çəvonədə hiç qıləi ittihomon ğəbul kardə ni, de siyosi sifarişi dastqir be bəyon kardən.