Almaniya vətəndor Azərboyconi istintoğ təcridxonədə oğətə bedə

Almaniya vətəndor Həmzə Məmmədli 1 sorisə veye ki, Azərboyconədə istintoğ təcridxonədə oğətə bedə.

33 sininə Həmzə Məmmədli 2015-minə sori Azərboyconiku bə Almaniya kuçış kardə, tibb kollecədə təhsilış sə, klinikadə doktori koməkəkə ko kardəşe.
2023-minə sori fevralədə Almaniya vətəndorətış sə əmmo,  Azərboyconi vətəndorətişən oğətə. 
Təxminən 6 manq bə peş, 2023-minə sor iyuli 1-də bə istə vəyə omə Həmzə Boku həvo portədə oğətə bə. 
Məlum bə ki, hələ 2018-minə sor iyuli 18-də Həmzə Məmmədli barədə de Azərboycon Cinoyət Məcəllə “Bə terrorəti vanq” iyən “Bə dövləti vəynə vanq” maddon cinoyət ko oj kardə bə, əv, ğiyobi dastqir kardə bə.
Almaniya Xarici Koon Vəzorəti bə “Deutsche Welle” doə cəvobəda votə bə ki, Məmmədli vəziyyətiku xəbərdorin, Azərboyconədə holiədə dastqirətiədə bə yekganə Almaniya vətəndore. Əmmo Almaniya bın məsələ fəol mıdaxilə karde imkoniku məhrume, çumçoko Məmmədli həmən Azərboyconi vətəndore və əv bın koədə həmonə statusəda muhakimə bedə. 
“Almaniya Xarici Koon Vəzorət iyən Almaniya Bokuədə səforət ın ko diğğətədə oğətedə, Məmmədli dastək karde ro de Azərboyconi hakimiyyət orqanon muntəzəm iyən penə səviyyədə əlağon oğətedə”, – vəzorəti cəvobədə ğeyd kardə bedə.