Avropa Məhkəmə Azərboyconış 1 milyon 693 həzo avro məbləğıdə cərimə karde

Avropa İnson Huğuğon Məhkəmə (AİHM) mılkiyyət huğuği darışte ro Azərboyconı  1 milyon 693 həzo 892 avro məbləğədə təzminot doe ğəror omə.

AİHM ğəror Bokuədə “Zımostonə park”i inşoədə həmonə ərazionku bekardə xonəxon ərızon əsnoədə doə bə.
Fizuli, Səməd Vurğun, Şəmsi Bədəlbəyli iyən Topçubaşov kuçonədə 500-sə vey jimon iyən ğeyri-jimon sahon de Boku Şəhər İcro Hakimiyyəti sərdori 2008-minə sor doə sərəncomi oçonə, əjiyon bekardə bən.
Bın koədə həmmə ərızəvonon ədolətinə məhkəmə tədğiğ iyən mılkiyyət huğuğon mıdaxilə beku şikot kardəşone.
AİHM hələ 2022-minə sor bın koy ro kali mılkiyyətəvonon huğuğon darışte muəyyənış kardə be və kompensasiya məsələ həlli ro bəvon fəxtış doə be.
Yanvari 14-də AİHM hokuməti bə 18 ərizəvonon 1 milyon 693 həzo 892 avro məbləğədə maddi iyən mənəvi zərəri ro təzminot doe anqıl ğərorış oşko kardə.
Bə ğəror əsos, bə 3 manq, bə 18 ərizəvonon həmmə maddi, mənəvi zərər əvəz iyən xarc, məsrəfon əvəz doə bənine. Bə ərizəvonon doə bəni təzminoti umumi məbləğ 1 milyon 693 həzo 892 avro bənine.
Ərazi 7 hektar bə “Zımostonə park” 2013-minə sor may 10-də bə istifodə doə bə.
Həmon əraziədə bə kəon oçıniədə bəvon bo har 1 kvadratmetri ro 1500-2000 mənot doə bə.  De kompensasiya məbləği rozi nıbə kali xonəxon çəyo de zuy bekarde bən.