Jurnalist Xəyalə Ağayeva bə kəy dustoğəti vadoə nıbe

Meydan TV dastqirətiədə bə jurnalist Xəyalə Ağayeva bə kəy dustoğəti vadoe ro çəy vəkili doə vəsatəti yanvari 14-də Xətai Rayon Məhkəmədə diyə kardə bə.

De hakim Sulhanə Hacıyeva sərdorəti dəvardə məhkəmə prosesədə jurnalisti ıştənən iştirok kardəşe.
Vəkil  Xəyalə Ağayeva 40 rujr hiç qılı sobut-dəlil nıbe dastqirətiədə oğətə be bəyonış kardə.
De çəy sıxani, sıftənə sobuton bə miyon nınoə jurnalisti barədə dekabri 8-də doə bə dastqirəti ğəror holiədə bə kəy dustoğəti band vəsotəti diyə kardə hakim Sulhanə Hacıyeva tərəfo doə bə.
Vəkili ın votəyon hakimış əsəbin kardə.
Meydan TV əlidə koəkon, oxonə 1 sor 2 manqədə dastqir bə jurnalist və ictimoi fəolon veyni barədə dastqirəti ğəroronədə Sulhanə Hacıyeva imzo hıste.
Məhkəmədə vəkili bəyonış kardə ki, Xəyalə Ağayeva de Cinoyət Məcəllə 206.3.2 (navədə daşt-bədast bə i dastə xonəxon tərəfo ğaçağmoləti) maddə ittihom bıboən, qətə ruji çəy kəyku bə jurnalist fəoliyyəti aid materialon peğətə bən, ımən dastqirəti əsll səbəbi de peşə fəaliyyəti band be oşko kardə.
Vəkil Xəyalə Ağayeva taxsikor nıbe ğeydış kardə, çəy bə kəy dustoğəti vodoe piyəşe.
Mıstəntığe bın votəyon etiroz kardəşe, çəy dastqirətiku vadoe bə istintoğe mane bəzne be iddioş kardə.
Hakimi vəsotətış təmin kardə ni.
Vəkil məhkəmə çın ğəroriku apelyasiya şikot bədo.
Meydan TV 6 koəkə dekabri 6-də qətə bən. Çe əvon həmməy barədə bo sıftənə istintoğ mıddəti ro 4 manq dastqirəti ğətmko tədbir vıjniyə bə.
Dastqir bə jurnaliston ıştəni taxsikor zınedənin, bə jurnalist fəaliyyəti ro dastqir kardə be bəyon kardedən
Oxonə 1 sorədə Azərboyconədə tosə 30 kəsi jurnalist iyən bloqqer dastqir kardə bən.