Donald Tramp fələstinovojon Ğəzzaku bekarde təklif kardəşe

Amerikə İbə Ştaton Prezident Donald Tramp fevrali 4-də de İsraili Sər Vəzir Benyamin Netanyahu bə ico dəvonə mətbuat konfransədə fələstinovojon Ğəzzaku bekarde və bə Amerika nəzarət ovoştone təklif kardəşe.

Trampi bəyonış kardə ki, Ğəzza bə Amerika nəzorət ovaşte bə məntəğə sobitəti iyən iğtisodi rifoh bəvarde.
De çəy sıxani, fələstinovojon əraziku bekarde və Amerika İbə Ştaton məntəğə bə nəzarət peğəte, Ğəzza bo mıxtəlif milləton sulh şəraitədə jimoni bə mıkəmməl qılı məntəğə pebəqordone.
Im plan fələstinovojon bə ğlidə keşvəron kuçi bə jimon dəvonə bə be.
Amerika Prezident bə ın məğsədi rəse ro Amerika hərbi zu istifadə be istisnoş kardə ni.
Tramp bə İordaniya, Misir iyən əlidə ərəb keşvəron ğəzzavojon ğəbul karde vanqış kardə.
De Trampi dın təklifi nə ğəzzavojon, nəən HƏMAS rozi nin. Əvon Ğəzzadə mande piye bəyon kardəşone. Trampi ın təklif bə məntəğə xaos iyən şiddət bəvarde, ğəzzavojon ın eçınon bə jimon dəvone imkon nıdoe bəyonşon kardə.
2023-minə sor oktyabri 7-də HƏMAS hucumi bədiqə İsraili Ğəzzadə hərbi əməliyyat binoş kardəa.
De İbə Milləton Təşkiloti doə məlumoti, tosə 2024-minə sor sentyabri  Ğəzzadə binon niməsə vey rıjiyən,  kıştəyon hisob 47 həzo dəvardə. İsrali hucumi nəticədə kıştəyon dılədə xeyli əğılon iyən zənənon hıstin
Yanvarə manqədə tərəfon miyonədə mıvəğğəti otəşbırye razoəti bə, kali əsiron təğyir kardə bən.